Ku munsi wa Gatanu Ishyaka Green Party riharanira Demokarasi no kurengera ibidukikije ryakomereje ibikorwa byo kwiyamamariza mu ntara y’Iburasirazuba mu turere twa Nyagatare na Gatsibo, abaturage bizezwa ko ibibazo by’ingutu bibugarije bizashakirwa ibisubizo mu gihe bazaba bagiriye icyizere iri shyaka ngo kuko ibyo biyemeje bishyirwa mu bikorwa.
Dr Frank Habineza umukandida wiyamamariza ku mwanya wa Perezida wa Repubulika ndetse n’imyanya mu nteko Ishinga amategeko, Ishyaka riharanira demukarasi no kurengera ibidukikije (Democratic Green Party of Rwanda) ryavuze ko ibyo risezeranyije abanyarwanda bishyirwa mu bikorwa.
Umukandida Dr Frank Habineza yifashishije ingero z’ibyakozwe bitewe n’ubuvugizi bakoze mu matora ya 2018 hari ibyo ryari ryarasezeranyije abanyarwanda ndetse ngo ibyinshi byamaze gushyirwa mu ngiro.
Dr frank Habineza yagize ati: "Muri 2017 ibyo navuze byashizwe mu bikorwa, Ishyaka Green Party ntabwo tubeshya ibyo twiyemeje gukora tubishyira mu bikorwa, urugero nitwe twatanze igitekerezo cyo kongera umushahara wa mwalimu ndetse n’uw’abapolisi n’Abasirikari, byarakozwe. Kugaburira abana kubishuri nitwe twabisabye kubera ko abana bigaga batariye ntibatsinde mu ishuri bakirirwa basinziye kubera inzara; twebwe turi kimaranzara, ibyo tuvuze biraba ntabwo tubeshya. Natanze iki igitekerezo cyo kugaburira abana ku ishuri mu nteko abantu bantera ubwoba baravuga ngo baranyirukana, ndabawira ngo ntabwo naje gushaka umugati, naje gushakira ibisubizo abanyarwanda."
Hon Dr Frank Habineza yakomeje agaragariza abaturage bo mu ntara y’Iburasirazuba mu turere twa Nyagatare na Gatsibo ko nibaramuka bahagiriye icyizere hari byinshi bibangamiye abanyarwanda bizakemuka.
Yagize ati: "Green Party ni icyizere cy’abanyarwanda, ibyo tuzakora mu gihe muzadutora ku mwanya w’Umukuru w’Igihugu tukagira n’abadepite benshi mu nteko Ishingamategeko harimo kurengera imibereho myiza y’abaturage, ku buryo buri muturage abasha kurya nibura inshuro eshatu ku munsi, tuzashyiraho ikigega cyishyura indishyi ku baturage bafungirwa mu bigo bya transit centers iminsi 30 bikarangira babaye abere, igihe cyabo baragitaye bafunzwe, ibyo bizakurwaho nimuramuka mutugiriye icyizerere."
Mu bindi byagarutsweho mu migabo n’imigambi nuko mu buhinzi n’ubworozi buzatezwa imbere aho byibuze muri buri murenge hazubakwamo uruganda rutunganya ibikomoka muri ako gace.
Green Party kandi ivuga ko ikoranabuhanga batazaryibagirwa, umusoro ku butaka nawo uzagabanywa umuturage ajye akoresha ubutaka bwe nta mafaranga atanze.
Ibikorwa byo kwiyamamaza ku munsi wa Gatandatu bizakomereza mu ntara y’Amajyepfo mu karere ka Nyanza tariki ya 27 Kamena 2024.
Yanditswe na Jean Claude Ndayambaje
