Yanditswe na Mutungirehe Samuel
Kimwe n’abandi Banyarwanda bizihije Umunsi w’Umuganura, abatuye mu kagari ka Muyange mu Murenge wa Kagarama mu karere ka Kicukiro nabo ibirori byari bibereye ijisho, byaranzwe n’ibiganiro byakurikiwe no gusangira umuganura bishimira ibyagezweho, abakiri bato nk’urubyiruko basabwa gukomera ku Muco bakarushaho kuwusigasira.
Iki cyari igikorwa cyo kwishimira no gusangira umusaruro weze, bishingiye ku ndangagaciro yo gukunda Igihugu, gukunda Umurimo, n’Ubupfura.
Ni umuhango wizihijwe hirya no hino mu kagari ka Muyange, ku nsanganyamatsiko igira iti Umuganura isôoko y’Ubumwe n’ishingiro ryo Kwigira.
Bakomereje no gusangiza Umuganura abakiri bato bazasigara mu njishi y’umuco bawusigasira
Uwatanze ikiganiro ni Dr. Uwizeye Diedonne, Umwalimu, umushakashatsi muri Kaminuza y’u Rwanda ishami rya Huye, akaba n’umuyobozi w’agashami kigisha amasomo y’iterambere (Development Studies), mu ishami ry’Imiyoborere, Iterambere, n’Umuryango.
Yagarutse ku mateka y’abakurambere b’u Rwanda rwo hambere, anashishikariza urubyiruko n’abaturage b’Akagali gukomera k’Umuco wacu (Abanyarwanda) agira ati: Umuco ntugacike!
Ubusanzwe, Ijambo Umuganura ni ijambo rikomoka ku nshinga Kuganura. Iki cyari igikorwa cyo kwishimira no gusangira umusaruro weze, bishingiye ku ndangagaciro yo gukunda Umurimo. Abanyarwanda basanganywe umuco wo kuganura n’umutima wo kuganuza. Uwejeje mbere, asangira n’abe bikitwa kubaganuza: ababyeyi baganuza abana, abana bakaganuza ababyeyi, ndetse n’abaturanyi bakaganuzanya.
Umunsi w’Umuganura usigaye wihizizwa ku wa Gatanu w’icyumweru cya mbere cy’ukwezi Kwa Kanama buri mwaka.
Abato basangijwe Umuganura basabwa gusigasira umuco w’igihugu
Umuganura ugira umwihariko wo gusangira ku bihingwa by’u Rwanda bitari mva mahanga
