Mutungirehe Samuel
Polisi y’u Rwanda yeretse itangazamakuru abantu barindwi bacyekwaho kwiba imiti n’utwuma twifashishwa mu gupima COVID-19 na Sida two mu mavuriro ya Leta bakayicuruza mu mavuriro yigenga.
Ni igikorwa cyabaye i Kigali kuri uyu wa Gatanu tariki ya 19 Werurwe 2021.
Umwe muri abo bantu yabwiye abanyamakuru ko ibyo yacuruzaga, icyo yakoraga ari ukubiragura abihawe n’abakozi bo muri farumasi za Leta kimwe no mu bakora muri za Laboratwari bakumvikana ku nyungu.
Yakomeje avuga ko yahindukiraga akabicuruza mu mavuriro yigenga no muri za farumasi kimwe no mu bakora mu mavuriro y’ingoboka yigenga (Post de Sante).
Muri abo harimo kandi n’umwe mu bakora muri farumasi y’akarere ka Gasabo, yeruriye itangazamakuru ko yari amaze amezi agera kuri atanu agurisha ibyo bikoresho mu buryo butemewe.
Polisi yavuze ko abenshi mu bakekwaho icyo cyaha ari abikorera bakabyiba babifashijwemo n’abo mu mavuriro ya Leta babifitemo indonke zabo.
