By Scovia Mutesi
Mu karere ka Rusizi ku kigonderabuzima cya Nkombo, Minisitiri w’Ubuzima Dr Diane Gashumba yatangije igikorwa cyo gutanga urukingo rwa Ebola muri gahunda yiswe UMURINZI ku baturage batuye mu kirwa cya nkombo kuko nabo ni bamwe mubambukiranya umupaka bajya muri Repubulika Iharanira Demokarasi ya Congo yagaragayemo icyorezo cya Ebola.
Itangwa ry’urukingo rwa Ebola mu Rwanda rije nyuma y’inyigo n’isesengura ryakozwe hirya no hino kw’isi, ndetse itsinda ry’impuguke za OMS zemeje ko uru rukingo rwakoreshwa mu bihugu byagaragayemo Ebola cyangwa se ibyegereye aho yagaragaye. Ni muri urwo rwego u Rwanda nk’igihugu gituranye na Repubulika iharanira demokarasi ya Congo rwatangije itangwa ry’urukingo ku baturage barwo bafite ibyago byinshi byo kwandura Ebola.
Abaturage batuye mu kirwa cya Nkombo batunzwe n’ubucuruzi bwambukiranya umupaka. Aba baturage bavuga ko ubucuruzi bwabo bubera hagati mu kiyaga cya Kivu bagahererekanya ibicuruzwa n’abaturage ba Congo. Nkuko bivugwa na Nyiraruvugo Maritha ucuruza isambaza yagize ati “abavandimwe babazayirwa dukorera hamwe nibo tugurisha isambaza zacu. Ariko ubwo Ebola yadukaga muri ako gace, twatangiye kwirinda nkuko abaganga babivuze. None ubwo habonetse urukingo n’ibintu bigiye kudufasha kutandura indwara ya Ebola”
Nyiraruvugo akomeza avuga ko hari amakuru avuga ko iyo bakingiye umugabo bituma atazongera gutera akabariro (gukora imibonano mpuzabitsina) abagore bo ngo ntibabyara nizo mpungenge dufite.
Amakuru avugwa n’abaturage, abaganga babivugaho iki?
Dr Placide Nshizirungu, umuyobozi w’ibitaro bya Gihundwe avuga ko ibyo abaturage bavuga atari byo, yagize ati “ibyo bavuga sibyo kuko uru rukingo rwa Ebola rurizewe. Abaruhawe mbere ntakibazo bagize, barimo abakora mu nzego z’ubuzima n’abashinzwe umutekano. Ahubwo abaturage bitabire kwikingiza kugira ngo birinde. Hari uramutse agize ikibazo cy’umuriro cyangwa akarwara umutwe, turamufasha kuko umuti wose ugira ingaruka zawo bitewe n’umubiri w’umuntu ariko urukingo ntacyibazo rufite”.
Minisitiri w’Ubuzima Dr Diane Gashumba, ubwo yatangizaga ikingira kuri iki kirwa cya Nkombo, yashimiye abaturage bahatuye kuko bumviye inama za muganga birinda Ebola bakaraba muntoki, birinda kurya inyamaswa zipfushije, kandi bakanyura ahari abagaganga kugirango babapime mugihe bavuye i Bukavu.
Minisitiri Dr Diane Gashumba yagize ati “kuba mwarumviye inama z’abashinzwe umutekano,abaganga,abajyanama b’ubuzima, ibyo byatumye mu gihugu cyacu hatagera Ebola, ibyo turabibashimira. Ariko mwitabire no gukingirwa kugirango kwirinda bigerweho. Uru rukingo rwashatswe kugirango mubeho neza nkuko Perezida wa Repubulika ahora abitwifuriza nk’abanyarwanda kandi mwirinde ibihuha bibabuza kwikingiza”.
Minisitiri Dr Diane Gashumba mwifoto y’urwibitso n’abaturage ba Nkombo
Uyu murenge wa Nkombo ugizwe n’utugali dutanu (5) utuwe n’abaturage ibihumbi cumi n’icyenda magana cyenda na mirongo irindwi na batanu (19975), aba bose bakazahabwa urukingo rwa Ebola havuyemo abana bari munsi y’imyaka ibiri n’abagore batwite kuko batemerewe gufata uru rukingo.
Uru rukingo rutangwa mu byiciro bibiri, urwa mbere rukurikirwa n’urwa kabiri nyuma y’amezi abiri uhereye igihe urwa mbere rwatangiwe.
Mu Rwanda hazakingirwa abaturage ibihumbi 200 bo mu turere twa Rubavu na Rusizi.
Uru rukingo rukorwa n’ikigo cy’Abanyamerika ‘Johnson and Johnson’.
