MUTUNGIREHE Samuel
Minisiteri y’Ubutegetsi bw’Igihugu, ubuyobozi bw’intara z’igihugu n’Umujyi wa Kigali bagiye guhurira mu bukangurambaga bwo gushishikariza abaturage baheruka gufata urukingo rwa mbere kwihutira gufata urwa Kabiri, ni mu gihe habarurwa abagera kuri miliyoni imwe n’ibihumbi hafi Magana 200 bagejeje igihe cyo gufata urukingo rwa Kabiri bityo bakazabona n’uko bafata urushimangira ku gihe.
Ni gahunda ireba abamaze iminsi 28 bahawe doze ya mbere batarabona iya kabiri, barimo abikije mu kwa 11 ndetse no mu kwa 12 umwaka ushize.
Minisitiri w’Ubutegetsi bw’Igihugu Gatabazi Jean Marie Vianney, yatangarije Radio y’igihugu ko byaganiriweho mu nama yagiranye n’abayobozi b’Intara n’umujyi wa Kigali mu buryo bw’iya kure, kugira ngo bajye kwibutsa no gushaka abaturage baheruka doze ya Mbere y’urukingo rwa COVID-19 bafatanyije n’inzego zose zifite mu nshingano ubukangurambaga kugeza ku bajyanama b’ubuzima mu mudugudu.
Yagize ati “Tuzifashisha buri umwe wese ufite mu nshingano ze ubukangurambaga kugira ngo aba bantu bakingiwe urukingo rwa mbere babone urwa kabiri bityo bazashobore no kubona urwa Gatatu rushimangira, bityo duhangane na COVID-19 ku buryo tuzagenda tuyirandura ikatuvamo, yanaza ikaza ari nk’akantu gatoya gatambuka.
Abantu bamaze kwikingiza murabizi niyo yakugeraho ntacyo igutwara kidasanzwe ariko utarikingiza iba ishobora kuguhitana ikagutwarira ubuzima.”
Gatabazi yijeje ko byanze bikunze guhera ku wa mbere, tariki ya 17 kugeza 25 Mutarama 2022 abo batarafata urukingo rwa kabiri bazaba barangije kwikingiza.
Ati “Mu bushakashatsi bwihuse twagiye dukora muri ino minsi bigaragara ko hari abantu barwaye, abafite ibibazo byo mu mutwe, abafite ibibazo byo kuba badashobora kugenda ngo bakora urugendo; abo bose bagiye bacikanwa, muri ibi bikorwa twari tumazemo iminsi itatu tujya mu ngo ku ngo twasanze hari abantu bameze gutyo, bitatewe n’ubushake bwabo ahubwo byatewe n’ibibazo bagenda bahura nabyo by’ubuzima.
Ubwo rero abongabo bashoboye kwigeza kwa muganga aho dukingirira bazajya bafashwa babageze ahongaho bakingirira, abadashoboye ku buryo budasanzwe tubasange mu rugo tubakingire ariko abandi bakuru n’abashobora kugenda bazajya bajya kuri site zateganyijwe.”
Minisitiri Gatabazi yakomeje avuga ko hari n’abakingiwe bakaba barimutse mu gace bafatiyemo urukingo baheruka, bityo nabo nta kibazo bazagira bazajya bafatira urwa kabiri cyangwa urushimangira aho bageze.
Ati “Ngira ngo tunafite n’urutonde rwabo kuko abikingije urukingo rwa mbere bo umwirondoro uba uhari, hari na za telephone wabashakiraho ukabahamagara kugira ngo baze kwitabira urukingo rwa Kabiri.”
Gatabazi yaboneyeho kwibutsa abinangira gukingirwa ko nabo bakwiye kumenya ko Leta ifite inshingano zo kurinda ubuzima bwabo, cyane ko byagaragaye ko hari n’abashishikarizaga abandi kwanga kwikingiza ariko bagatungurwa n’uko COVID-19 ibagezeho ikabahitana.
Mu bindi Minisitiri Gatabazi yavuze baganiriyeho n’abayobozi b’intara uko ari enye n’Umujyi wa Kigali birimo kubibutsa inshingano zabo zirimo gukomeza gushyira mu bikorwa ibikubiye mu mihigo n’ibyo Perezida Kagame yemereye abaturage muri Manda y’Imyaka 7 izarangira mu 2024.
Hari kandi gusaba abayobozi gukemurira abaturage ibibazo biri muri serivisi bashaka ku buyobozi bwa Leta, birimo ibiba bimaze igihe bibangamira ubuzima bwabo bikabatwara n’umwanya wo gukora ngo biteze imbere.
