Yanditswe na Ndayambaje Jean Claude
Bamwe mu baturage bo mu karere ka Musanze, umurenge wa Gacaca n’abandi bajyaga bakora ubucukuzi bwa Zahabu mu kirombe kitemewe bahawe umuburo wo kuzibukira babwirwa ko rimwe imvura y’amahindu izabanyagira bakumirwa.
Ibi babibwiwe kuwa Gatandatu tariki ya 27 Gicurasi 2023 ubwo bari basoje umuganda ngaruka kwezi mu Kagari ka Cyabararika, mu Murenge wa Muhoza ahitegeye mu kibaya cya Gatare cy’Akarere ka Musanze, ari naho hakorerwaga ubucukuzi bwa Zahabu butemewe.
Mu mvugo abacukuraga bari baziranyeho, abaturage mu minsi ishyize bishoraga mu kirombe maze babona umuyobozi cyangwa izindi nzego z’ubuyobozi z’ibanze bose bagatera hejuru bati "Imvura iraguye, imvura iraguye" maze abandi bakamenya ko hari umuntu udasanzwe uje, hanyuma bakitegura kurwana bose bavuza induru, ndetse ushatse kubegera bakamugirira nabi.
Umuyobozi w’Inkeragutabara (Reserve Force) mu Ntara yAmajyaruguru, General Eric MUROKORE , ari kumwe n’umuyobozi w’Ingabo mu Ntara y’Amajyaruguru, Brigadier General MUHIZI Pascal n’umuyobozi wa Polisi mu ntara yAmajyaruguru CSP Francis Muheto, bari kumwe bifatanyije n’abaturage mu muganda maze batanga ubutumwa bukomeye.
Major General Eric MUROKORE yasabye aba baturage kuzibukira ibi bikorwa bigayitse birimo no gusagararira abayobozi.
Agira ati: "Twumvise ko musigaye mukubita abayobozi banyu, ngo mwarabakubise mwabaragije ikiboko, mudugudu we ngo atega ikibuno mugakubita, agataha afasheho, icyo ni icyaha gikomeye, ntimuzabyongere. Ibyo ntabwo biba mu Rwanda nta bwo ari umuco w’i Rwanda, mugomba kwirinda mukarinda bagenzi banyu, ikizakurikiraho ni ukurindwa rero."
Yakomeje abagira inama ati: "Iyo mvura muvuga iguye, umunsi yaguye izaba amahindu, kandi mwatitira atariko twe tubishaka; muravuga muti ‘Imvura iraguye, yari yagwa se? Muravuga itaragwa umunsi yaguye izabanyagira, amahindu murayazi? Izagwa ibe amahindu, umunsi yabanyagiye muzatitira kandi ntabwo dushaka ko mutitira nureke iyo mvugo mbi."
Nyuma y’umuganda Umuyobozi wAkarere ka Musanze Ramuli Janvier yijeje ko bigiye gutanga icyizere ko nta muntu uzasubira muri kiriya kirombe ashaka zahabu.
Aragura ati: "Izi nzego mwabonye zirimo abayobozi b’ingabo, abayobozi ba polisi, mu ntara, mu karere; kuva twese twahagurutse, ni byo biduha icyizere ku bufatanye bw’inzego z’umutekano n’abaturage ubwabo, biraduha icyizere ko nta we uza gusubira muri iki kirombe.
Si ubwambere akaduruvayo kabaye mu icukurwa rya zahabu mu karere ka Musanze kuko no mu mwaka ushyize wa 2022 mu murenge wa Rwaza hari abaturage bacukuraga mu buryo bunyuranyije n’amategeko ndetse icyo gihe abakozi b’Urwego rw’ubugenzacyaha (RIB) basagariwe n’abari mu kirombe ndetse bakwa imbunda, cyakoze hakozwe inama iyo mbunda nto, izwi nka pistoli barayigarura.
Hakozwe umuganda wo gusubiranya aho abantu bacukuye zahabu bitemewe
