Bamwe mu baturage bo mu karere ka Musanze, baravuga ko bahangayikishijwe n’ikiraro kirimo guteza impanuka kubera uburyo gikozemo.
Ni ikiraro gihuza umurenge wa Musanze na Cyuve, kikaba hagati mu tugari twa Cyabagarura na Kabeza, gifite umuhora w’ubujyakuzimu buri hagati ya metero 6 na 7, kigatera bamwe isereri abanyantege nke bakakituramo.
Ubwo umunyamakuru wa mamaurwagasabo yageraga kuri iki kuraro yasanze ari icy’ibiti bisa nkaho byatangiye gusaza, abaturage bifuza ko cyakongera kubakwa mu buryo bubungabunga ubuzima bwabo.
Bunane Epimaque, ni umwe mu baturage bakoresha iki kiraro cyane, avuga ko yigeze kukivunikiraho.
Yagize ati: "Iki kiraro kiratubangamiye, njye ubwanjye nakiguyemo ndavunika nivuriza mu bitaro bikuru bya Ruhengeri, ndetse nagiye na CHUK, ubu nabaye ikimuga, twabisabye kenshi ko bakidukorera neza ariko gikomeza kuba gutya, hari n’abagiye bagwamo bagapfa, usibye njye Imana yarokoye. Turasaba ko badukorera byibuze ikiraro cy’imigozi gifunze mu mpande."
Undi muturage witwa Munyeshuri Abel nawe yagize ati: "Usibye n’abana duhora dufitiye impungenge natwe abantu bakuru tukinyuragaho, dufite ubwoba, hakenewe ubundi bushobozi twebwe nk’abaturage twariyenje dushyiraho ibiti ariko nawe ushyize mu gaciro ntabwo ikiraro cy’ibiti kireshya gutya wakinyuraho ngo wumve ufite amahoro, ushobora no gutsikira ukisanga hasi, batwubakire byibuze icyo mu kirere gikomeye."
Aba baturage bose bahuriza kukuba nta muntu ujya wita kuri iki kiraro kandi ngo kimaze guhitana ubuzima bw’abantu benshi aho babyuka bagasanga bamwe bakivunikiyemo.
Umunyamabanga nshingwabikorwa w’umurenge wa Musanze Bwana Edouard Twagirimana yavuze iki kibazo bakizi ndetse ngo bagiye bakiganiraho n’inzego.
Yagize ati: "Nibyo koko iki kiraro ndakizi giteye impungenge niba umuntu umwe aguyemo undi akagwamo urumva ko biba ari ikibazo , twakiganiyeho n’inzego ndetse biri muri gahunda twandikiye akarere tugasaba uburenganzira bwo gutema ibiti mu ishyamba rya leta kugira ngo gisanwe, ubwo turakomeza kubyitaho."
Muri iyi mirenge yombi Cyuve na Musanze hari umugezi unyuramo hagati witwa Rwebeya, usanga ibiraro byashyizweho ari ibiti kandi ari harehare cyane ku buryo abaturage bagenda babivunikiraho, usibye ikiraro kimwe kinyuraho imodoka kiri ahazwi nko kwa Kate n’akandi kararo kamwe ko mu kirere kari hafi n’ishuri ry’incuke rya Wisdom Schools, ibindi biraro hafi ya byose biri mu manegeka.
Ni kenshi abaturage bo mu Murenge wa Musanze na Cyuve bakomeje gutakambira ubuyobozi bw’Akarere ka Musanze bukabizeza ko buzabubakira ibiraro ariko ngo amaso yaheze mu kirere.
Yanditswe Jean Claude Ndayambaje
