Umugiraneza Alice
Abagore n’abagabo bo mu karere ka Nyabihu baritana bamwana ku gitera ihoterwa rishingiye ku gitsina mu miryango, abagore bavugako intandaro ari abagabo babo batanyurwa, abagabo nabo bakavuga ko ari abagore babo babakubita bityo bikabatera ipfumwe ryo kubivuga banga igisebo mu bandi.
Bamwe mu baganiye na mamaurwagasabo.rw bo mu mirenge ya Jomba na Karago muri ako karere, bavuga ko ihohoterwa rishingiye ku gitsina riterwa no kutanyurwa ku mpande zombi.
Scholastic Daphrose, wo mu murenge wa Jomba, avuga ko intandaro y’iryo hohoterwa riterwa n’abagabo batanyurwa, ati "Igihe kirageze ngo duhaguruke tuvuge ihohoterwa dukorerwa kuko umugabo arataha yasinze akirirwa ari mu bandi bagore, nubundi dusanzwe tubana n’ihohoterwa mu buryo bw’umubiri n’ubwimitekereze.
Nyiragishegesha Providence wo mu murenge wa Karago, we yagize ati "ku kijyanye n’ihohoterwa gukoreshwa imibonano mpuzabitsina itaganiriweho, hari ihohoterwa rirenze iryo?"
Ku ruhande rw’abagabo nabo bavuga ko nabo bakorerwa ihohoterwa ariko bakagira ipfunwe ryo kubivuga banga igisebo muri baganzi babo.
Mponigaba Leonard yagize ati" Hari igihe umugore akwima igitsina, ese ubwo hari ihohoterwa rirenze iryo?"
Ntakirutimana Moise avuga ko hari n’abagabo bajya bakubitwa bakaryumaho ngo badaseba mu bandi.
Yagize ati "Abagabo turakubitwa ndetse abagore bakatwima n’ibiryo, ukareba ukuntu ujya kuvuga ngo umugore yagukubise ugasanga biteye igisebo mu bandi ugahitamo gufungiramo ukicecekera.
Mu buryo bwo kurandura burubdu ihohoterwa rishingiye ku gitsina riterwa n’amakibirane yo mu miryango mu karere ka Nyabihu mu tugari 73 hashyizweho amatsinda 365 ashinzwe kwigisha ingo zibana n’amakimbirane.
Mategeko Safi akuriye ayo matsinda mu karere ka Nyabihu agaraza uburyo ayo matsinda y’abantu 5 muri buri kagali afasha mu kurandura ihohoterwa mu ngo.
Yagize ati "Hari ibiganiro dutegura tugatumira abagabo gusa bakatugaragariza ibibazo bafite, tukongera tugahuza abagore gusa nabo bakatuganiriza. Nyuma hari ibiganiro dutegura bibahuriza hamwe. Twagerageje gusura ingo tureba amakibirane uko yakemuka, tugerageza kwifashisha akarere kugira ngo kadufashe ibyo twe tutashoboye gukora."
Umukozi wa karere ka Nyabihu ushinzwe uburinganire n’iterambere ry’umuryango, Uwurukundo Monique, atangaza ko mu bukangurambaga bw’iminsi 16 buriho bafatanije nayo matsinda bazakomeza guhangana n’ihohoterwa rishingiye ku gitsina.
Yagize ati "Hari ibikorwa bitandukanye cyane ko aya matsinda mwayumvise ni inzego zihagarariye ibyiciro bitandukanye dufatanya umunsi ku wundi; intego yabo ni iterambere ry’umuturage, turasaba ayo matsinda, abaturage kurirwanya, gutangira amakuru kugihe, kurikumira, kurirwanya aho ari ho hose ryagaragaye."
Kugeza ubu mu karere ka Nyabihu amatsinda yashyizweho ashinzwe kurwanya ihohoterwa rishingiye ku gitsina, mu gihe cy’umwaka n’igice amaze kwigisha ingo 2216, muri zo ingo 1210 zaciye ukubiri no kurangwa n’amakimbirane mu miryango.
