MUTUNGIREHE SAMUEL
Mu mateka y’Isi umwaka wa 2020 ushobora kuza mu myaka idasanzwe yahitanye ibikomerezwa byinshi mu mwaka umwe, usibye ibyamamare bindi uyu mwaka wahitanye, ni umwaka wavuzwemo inkuru z’incamugongo z’abayoboye ibihugu na ba Minisitiri b’Intebe bapfuye mu mezi atageze ku mwaka wose barimo na Pierre Buyoya ubaye uwa 17 mu bo umaze guhitana ku mugabane w’Afurika.
Ku rutonde Mamaurwagasabo.rw yagerageje kugushakira, duhereye uyu munsi tariki ya 18 Ukuboza 2020, Inkuru y’incamugongo izindutse mu Burundi nk’uko tubikesha Radio Ijwi ry’Amerika (VOA) ni uko iki gihugu cyongeye kubura undi muperezida wayoboye icyo gihugu, Pierre Buyoya w’imyaka 71 akaba n’umwe mu bakuru b’iki gihugu wayoboye imyaka myinshi 13 muri manda zitandukanye ziganjemo izo yahiritsemo ubutegetsi bwa bagenzi be.
Nubwo umuryango we utarabyemeza, Buyoya apfuye akurikira Pierre Nkurunziza w’imyaka 55 nawe wapfuye muri uyu mwaka muri Kamena 2020 amaze gukoresha amatora habonetse umusimbura ari nawe uri ku butegetsi Gen. Maj. Evariste Ndayishimiye. Nkurunziza byatangajwe ko yazize umutima abandi ntibatinya kuvuga COVID-19.
Nkurunziza Pierre wayoboye u Burundi
Pierre Buyoya ariko agiye mu gihe Urukiko rwo mu Burundi rwamukatiye igifungo cya burundu nyuma yo kumuhamya uruhare mu rupfu rwa Perezida Melchior Ndadaye wishwe mu 1993.
Iby’inkru mbi ku mfu z’abahoze bayoboye ibihugu muri Afurka byatangiye ubwo Muri Gashyantare humvikanaga urupfu rwa Hosni Moubarak wigeze kuyobora Egypt, apfa afite imyaka 92.
Mu kwezi kwa gatatu, tariki ya 31 Werurwe 2020 humvikanye urupfu rwa Jacques Joaquim Yhombi-Opango wabaye Petezida wa Congo Brazzaville, apfa azize COVID-19 afite imyaka 81, i Paris mu Bufaransa.
Tariki ya mbere Mata 2020 humvikanye urupfu rwa Nur Hassan Hussein Adde wahoze ari Minisitiri w’intebe wa Somalia, ku myaka 82, aguye i London mu Bwongereza. Tariki ya 11 Mata 2020, muri Afurika nabwo habitswe urupfu rw’uwahoze ari Minisitiri w’Intebe wa Togo, Edem Kodjo, wapfuye afite imyaka 82 agwa i Paris mu Bufaransa. Mu kwezi kwa Kane, hapfuye Minisitiri w’intebe wa Lybia, Mahmud Jibril, wari ufite imyaka 68, azize COVID-19.
Uwahoze ari Minisitiri w’Intebe wa Togo, Edem Kodjo
Muri uko kwezi kandi Kenya yabitse urupfu rwa Daniel Arap Moi, ku myaka 95 wigeze kuyobora iki gihugu, agwa mu gihugu cye.
Daniel Arap Moi yasezewe n’Abanyakenya n’abandi baturutse ku isi iminsi itari mike
Muri Kamena nyuma ya Nkurunziza humvikanye urupfu rwa Franck Emmanuel Issoze-Ngondet wavutse mu 1961, yigeze kuba Minisitiri w’Intebe wa Gabon. Hashize ukwezi kumwe, mu kwa Karindwi humvikanye urupfu rwa Minisitiri w’intebe wa Côte d’Ivoire, Amadou Gon Coulibaly, tariki ya 8 Nyakanga 2020.
Minisitiri w’intebe wa Côte d’Ivoire, Amadou Gon Coulibaly
Mu minsi mike nanone muri uko kwezi kwa karindwi humvikanye inkuru mbi y’urupfu rwa Benyamin Mkapa wigeze kuyobora Leta Zunze Ubumwe bwa Tanzania.
Mu kwezi kwa munani, Kanama 2020 humvikanye urupfu rwa Pascal Lissouba, nawe wigeze kuyobora Kongo Brazzaville, apfa afite imyaka 88 aguye i Paris mu Bufaransa.
Mu kwezi kwa cyenda, Nzeri 2020 humvikanye nanone urupfu rwa Moussa Traoré, wayoboye Mali, apfa habura gati ngo yuzuze imyaka 83 y’amavuko.
Imfu z’abakomeye ntizahagarariye aho, kuko byageze mu kwezi gushize k’Ugushyingo humvikana imfu zitari nke z’abayoboye ibihugu na za Guverinoma muri Afurika.
Duhereye ku itariki ya 12 z’uko kwezi humvikana urupfu rwa Jerry Rawlings ku myaka 73, wigeze kuyobora Ghana.
Muri uko kwezi kandi ku itariki ya 10 humvikanye urupfu rwa Amadou Toumani Touré wayoboye Mali, yavutse mu 1948, apfira Istanbul muri Turkey afite imyaka 72.
Ugushyingo ntikwashyinguye abo gusa kuko humvikanye n’urupfu rwa Mamadou Tandja wayoboye Niger, apfa ku mwaka wa 82.
Humvikanye kandi urupfu rwa Sadiq al-Mahdi, wahoze ari Minisitiri w’intebe wa Sudan, afite imyaka 84, agwa muri Leta zunze Ubumwe z’Abarabu.
Mu Kuboza kandi humvikanye urupfu rwa Sidi Owalidou Abdallah wahoze ayobora Mauritania, afite imyaka 82.
Bamwe muri aba bahoze ari abakuru b’ibihubu na ba Minisitiri b’Intebe byagiye bivugwa ko bazize icyorezo cya COVID-19 gusa abandi ntibyemezwa neza n’ibihugu byabo.
