Yanditswe na Ndayambaje Jean Claude
Mu itangazo ryashyizwe ahagaragara ku munsi w’ejo na Minisiteri ya Siporo rijyanye n’icyorezo cya Covid-19 gikomeje gukaza umurego, Shampiyona y’Umupira w’amaguru n’andi marushanwa ategurwa n’ingaga za siporo byamaze gusubikwa.
Iri subikwa rya Shampiyona y’umupira w’amaguru mu cyiciro cya Mbere mu Rwanda ribaye ku nshuro ya Kabiri kuko mu mwaka wa 2020 nabwo ryarasubitswe bitewe na Covid-19 yari yugarije amakipe.
Ni shampiyona yari yatangiye tariki ya 30 Ukwakira, ikaba ihagaritswe igeze ku munsi wa 11 aho Kiyovu Sports iyoboye Urutonde rw’agateganyo n’amanota 24 , ikurukiwe na APR fc n’amanota 23 mu gihe Gorilla fc na Etencel ziza Ku mwanya wa nyuma.
Mu mikino ya Volleyball, hari hamaze gukinwa ibyiciro 2 by’irushanwa ryateguwe na Forzzabet, ibindi bitatu byari kuzakinwa muri Mutarama 2022 bishobora kudakinwa bitewe na Covid-19.
Ibi bikorwa by’imikino bihagaritswe mu gihe hari amakipe menshi yavugwagamo ubwandu bwa Covid-19 arimo APR FC, Kiyovu sports, AS Kigali, Rayon Sports, Gasogi United, Police FC, REG VC n’andi makipe atandukanye .
Usibye amakipe y’lgihugu n’andi makipe asanzwe ari mu mwiherero yitegura imikino mpuzamahanga yemerewe gukora imyitozo nabwo kandi igakorerwa mu muhezo, nta y’indi Kipe yemererwa gukora myitozo mu rwego rwo kwirinda ikwirakwiza ry’icyorezo cya COVID-19.
Mu yandi mabwiriza yashyizweho ni uko ibikorwa byemewe bigomba gukomeza nko kuba abagize ikipe bose bagomba kuba barakingiwe COVlD-19 mu buryo bwuzuye "uretse abari munsi y’imyaka 18" kandi berekanye ko bipimishije COVID-19 mu gihe cy’amasaha 24 mbere yo kwitabira imyitozo cyangwa amarushanwa.
Mu bindi bigomba kubahirizwa harimo ibikorwa by’imyitozo n’imikino y’amatsinda y’abatarabigize umwuga ndetse n’ibikorwa by’imyitozo yigisha abakiri bato, ntibyemewe kugeza igihe hazatangarizwa andi mabwiriza.
Abakinnyi , abatoza , n’abandi bantu bose bakaba basabwa kwizigiza mu buryo bw’uzuye mu rwego rwo gukomeza kwirinda icyorezo cya Covid-19 cyongeye kuzamuka mu Rwanda.
U Rwanda rubaye igihugu cya Mbere mu karere by’umwihariko ku Mugabe w’Afurika ruhagaritse shampiyona mu gihe ibindi bihugu byugarijwe na Covid-19 bitarafata indi myanzuro igomba kugenga imikino.
