Abarusiya babiri bafungiwe muri Malaysia kubera igikorwa bakoreye mu muhanda cyo gusimbagiza umwana wabo bamufashe amaguru bakajya bamutera mu kirere.
Polisi yabwiye ibiro ntaramakuru AFP ko uyu mugore n’umugabo bari guhatwa ibibazo ku kivugwa ko ari uguhohotera umwana wabo w’umukobwa w’amezi ane.
Videwo igaragaza uburyo bumwe bwo gusimbagiza uwo mwana yasakaye ku mbuga nkoranyambaga, bituma polisi ibikurikirana.
Aba babyeyi bari mu kigero cy’imyaka ya za 20 ishyira 30, bari gutembera mu gice cy’amajyepfo ashyira uburasirazuba bw’Aziya, baririmba banabyina mu muhanda, abanyuzwe n’ibikorwa byabo byo gususurutsa bakabaha imfashanyo.
Iyo videwo y’amasegonda 90, yashyizwe ku rubuga nkoranyambaga rwa Facebook n’umuntu wavuze ko ari "igikorwa kidashyize mu gaciro urebye cyakomeretsa", asaba ko polisi ikwiye kubata muri yombi.
Igaragaza umugabo ufashe umwana amaguru, akamutera hejuru y’umutwe we.
Akamutera hejuru inshuro nyinshi, hagashira akanya gato umwana ari mu kirere nta kimufashe.
Iruhande rwe hari itsinda ry’abandi bakomoka i Burayi bacuranga banaririmba. Iyi videwo yashyizwe kuri Facebook imaze kurebwa inshuro zirenga ibihumbi 28.
Ubuyobozi bwa Facebook bwatangaje ko bwanze kuyikura kuri uru rubuga kuko "ishobora gufasha mu gutabara uwo mwana".
Iyi videwo n’ubu iracyashobora kurebwa kuri Facebook, ariko ikaba iri kumwe n’ubutumwa buburira buvuga ko "ishobora kwerekana urugomo rukorerwa umwana..."
Ababirebaga bari bumiwe
Polisi yafunze abo babyeyi ubwo bari bari mu kindi gikorwa nk’icyo bakoreraga ku muhanda wo mu murwa mukuru Kuala Lumpur wa Malaysia.
Mazlan Lazim, ukuriye polisi ikorera mu mujyi wa Kuala Lumpur, yabwiye AFP ati: "Twabafunze ku wa mbere ngo tubahate ibibazo ku kivugwa ko ari uguhohotera umwana wabo w’umukobwa w’amezi ane".
Yabwiye abanyamakuru baho ko uwo mwana nta kibazo yagize, ko nta n’igikomere kimugaragaraho.
Byinshi mu bitekerezo byatanzwe kuri iyo videwo kuri Facebook, bigaragaza kumirwa ku byakorewe uwo mwana, ababitanze bakavuga ko uwo mwana wabo bamukoresha mu gukorera amafaranga.
Kimwe muri ibyo bitekerezo kivuga ko ibyo byemewe n’amategeko mu Burusiya kandi ko ari ibintu bisanzwe.
Nubwo mu Burusiya naho bitavugwaho rumwe, bamwe bemeza ko bifasha umwana gukura vuba birushijeho.
Ibindi bitekerezo kuri iyo videwo byo bigaragaza uburakari, ababitanze bakavuga ko bisa nkaho abo babyeyi bari gutembera mu gice cy’amajyepfo ashyira uburasirazuba bw’Aziya basabiriza amafaranga.
Hakomeje kwiyongera igisa nk’umuco w’abakomoka i Burayi n’Amerika batemberera mu bihugu bicyennye byo ku mugabane w’Aziya, basabiriza amafaranga n’ubundi bufasha bwo kubafasha mu rugendo rwabo.
Akenshi ubu buryo buhimbwa "abasabiriza bahetse ibikapu". Bukomeje gutera urujijo cyangwa uburakari abaturage baho.
