Yanditswe na Imfurayabo Pierre Romeo
Ambasade y’Amerika mu Rwanda ku bufatanye n’ikigo cy’igihugu gishinzwe gutanga amaraso (NCBT). Hateguwe igikorwa cyo gutanga amaraso yatanzwe n’abakozi 108 ba Ambasade n’abandi ba diplomate bakorera imiryango mpuzamahanga.
Aya maraso yatanzwe akaba azifashishwa mu gikorwa cyo kuvura indembe ziyakeneye mu bitaro bitandukanye mu Rwanda.
Abakozi 108 ba Ambasade ya Amerika mu Rwanda na bagenzi babo bo mu yindi miryango mpuzamahanga ni bo bagaragaye muri iki gikorwa cyabereye ku cyicaro cy’iyo ambasade ku Kacyiru mu Mujyi wa Kigali, ku wa 20 Werurwe 2019.
Ku nshuro ya 10 y’iki gikorwa, Ambasade ya Amerika yatumiye abandi badipolomate bakorera i Kigali barimo ab’u Bufaransa, u Bwongereza n’u Budage bahuza imbaraga mu gikorwa cyo gutanga amaraso.
Umuyobozi ushinzwe Ibikorwa (Chargé d’affaires) muri Ambasade ya Amerika mu Rwanda, Richard Michaels, ni we watangije iki gikorwa cyiswe “Share Life, Give Blood”, bishatse kuvuga “Sangira n’abandi ubuzima, tanga amaraso.’’
Yagize ati “Nishimiye ko abakozi ba ambasade batanze amaraso n’umutima ukunze, ni uburyo bworoshye bwo gutanga ubutabazi. Ndizera ko igikorwa cyacu cyo gutanga amaraso gishishikariza buri wese mu Rwanda gutangira kuyatanga.’’
Ambasade ya Amerika mu Rwanda yatangiye gutanga amaraso mu 2012, aho yagize uruhare mu gushyikiriza udupaki 736 muri NCBT.
Intego yo gutanga amaraso inajyanye no gushyigikira ubukangurambaga bw’Ikigo cy’Igihugu gishinzwe gutanga Amaraso mu kuyageza aho ashobora kugoboka aho akenewe no gushishikariza abatuye u Rwanda gukangukira kuyatanga ku bushake kandi mu buryo buhoraho.
Ni ku nshuro ya 10, abakozi ba Ambasade ya Amerika batanze amaraso yo kugoboka indembe ziyakeneye
Iki gikorwa Ambasade ya Amerika yagiteguye ifatanyije n’Ikigo cy’Igihugu gishinzwe gutanga Amaraso (NCBT)
Abakozi ba Ambasade ya Leta Zunze Ubumwe za Amerika mu Rwanda bishimiye gutanga amaraso
Amaraso yatanzwe azakoreshwa mu gutabara inkomere, abarwayi babazwe, n’abafite indwara zo kubura amaraso ahagije mu mubiri mu Rwanda.
Biteganyijwe ko kandi hari azoherezwa mu bitaro hifashishijwe Drones za Zipline zitwara amaraso ku bitaro byo mu gihugu.
Mu mpera za 2018, izi ndege zitagira abapilote zatangiye mu 2016 nk’igisubizo mu koroshya ubutabazi ku barwayi bakeneye amaraso byihutirwa batuye mu misozi, zari zimaze kujyana udupaki 15 700 tw’amaraso ku bitaro bitandukanye ziyakuye ku kibuga cyazo kiri mu Karere ka Muhanga.
