Mu rugendo rwo gushakisha umukobwa uhiga abandi mu bwiza, umuco n’ubwenge, ntibyari byoroshye mu bahataniye guhagararira Umujyi wa Kigali, aho abakobwa 29 ari bo bahawe PASS mu rugendo rwo gushaka uzasimbura Miss Ingabire Grace ufite ikamba rya Nyampinga w’u Rwanda mu 2021.
Ni abakobwa babonetse nyuma y’akazi katoroshye kakozwe n’abagize Akanama Nkemurampaka ka Miss Rwanda 2022, ahasuzumwe imishinga, ubwiza n’umuco w’abagera kuri 117.
Abakobwa 29 batoranyijwe mu Mujyi wa Kigali kuri uyu wa Gatandatu tariki 12 Gashyantare 2022, biyongereye kuri 51, batoranyijwe mu Majyaruguru, Amajyepfo, Uburengerazuba ndetse n’u Burasirazuba.
Abakobwa 117 nibo banyuze imbere ya Umurerwa Evelyne, Miss Mutesi Jolly na Munyaneza James, bagenda bagaragaza imishinga yabo, nyuma haza gutoranywamo 29.
Ni ukuvuga ko aba bakobwa bose uko ari 70 bazahatanira kujjya mu mwiherero mu birori biteganyijwe kuba ku wa 26 Gashyantare 2022.
