Mu gitaramo cyo kwizihiza umuganura uba buri mwaka mu Rwanda, abanyeshuri bo ku kigo cy’Urwunge rw’amashuri Gatolike Kabuga basabwe kujya bagira imihigo kandi bagaharanira kuyesa kuko iyo uhize bigutera ishyaka, ishyaka rikagufasha kuba umunyabigwi, ibigwi bikagutera ishema mu buzima bwawe bwose.
Kuri uyu wa gatanu tariki ya 03 Kanama 2018, umunsi mukuru w’umuganura muri G.S Gatolike Kabuga wari witabiriwe n’abanyeshuri basaga ibihumbi 4 biga muri iki kigo bari kumwe n’ababyeyi babo.
Umutahira w’itorero ry’akarere ka Gasabo yasabye abanyeshuri kugira imihigo mu byo bakora kandi bagaharanira kuyigeraho.
Umutahira w’intore mu karere ka Gasabo wari umushyitsi mukuru yasabye abitabiriye ibi birori ko bagomba kugira umuco wo guhiga no kwishimira ibyo bagezeho kuko bitera imbaraga bigafasha nyir’uguhiga gukora cyane kugira ngo agere kubyo yiyemeje.
Ati, “kuganura si iby’ejo cyangwa ejobundi ahubwo byahozeho kuva na kare ariyo mpamvu tutagomba gukora ibirori ngo twishime gusa birangire ko ahubwo tugomba kugira umwanya wo kwisuzuma tukareba ibyo tumaze kugeraho byaba ari byiza tugakomereza aho haba hari aho twagize intege nke tukiyemeza gukora byiza birushijeho”
Yakomeje asobanurira abanyeshuri n’ababyeyi babo ko kugira ngo habeho umuganura byasabye imbaraga nyinshi no kwitanga kw’abatubanjirije ariyo mpamvu ugomba gufatwa nk’umunsi ukomeye.
Ati, “Ni umunsi ngaruka mwaka wahozeho na mbere y’umwaduko w’abazungu, ukaba warakorwaga hobonetse umucyo, u Rwanda rwigeze kunyagwa n’abanzi, Abanyoro barwigarurira imyak 15, Ruganzu wari warahungishirijwe i Karagwe k’abahinda yiyemeza kurwana arabaganza asubirana igihugu nyuma abaturage bamaze kubona bongeye gutunga bagatunganirwa biyemeza ko bazajya bategura umunsi wo kwishimira ibyo bagezeho no guhiga ibyo bagomba gukora”
Umuyobozi wa G.S Gatolike Kabuga, Kubwimana Jean Bosco yabwiye abitabiriye igitaramo cy’umuganura ko ari ngombwa gukundisha abana imihigo no kuba abambere mu kuyesa kuko kugira ubutwari ngo bitareba abantu bakuru gusa ahubwo ko bitangira umwana akiri muto.
Muri iki gitaramo cy’umuganura, hahembwe abanyeshuri n’abarimu babaye indashyikirwa (harimo n’umwarimu wigishije kuri iki kigo kuva mu 1970 kugeza mu 2018) mu rwego rwo gukundisha abandi guhangana no guharanira kugera ku ntego biyemeje.
Umuganura wizihizwa mu mwero w’imyaka, aho umuryango n’abaturanyi bahurira hamwe bakanywa amarwa ya Kinyarwanda ,amata y’inka, bakarya n’umutsima w’amasaka,
