Ndayambaje Jean Claude
Federasiyo y’umupira w’Amaguru mu Rwanda "FERWAFA" yahagaritse Stade Umuganda ku kwakira imikino ya Shampiyona kubera ko yangiritse bitewe n’umutingito w’iruka ry’ikirunga cya Nyiragongo riherutse kuba.
Kuri uyu wa Kabiri tariki ya 16 Ugushyingo 2021, FERWAFA yafashe icyemezo cyo guhagarika Stade Umuganda yo mu Karere ka Rubavu mu gihe iki kibuga cyakiniweho iminsi ibiri ibanza ya Shampiyona y’umwaka 2021-2022 ndetse yari yarategetswe ko nta mufana yakira nubwo abafana baya makipe bifuzaga ko bakomorerwa.
Ku ikubitiro basabwe kuba babonye ikindi kibuga bazajya bakiriraho bitarenze tariki ya 17 Ugushyingo 2021. Amakipe arimo Etincelles FC, Marines FC na Rutsiro FC asanzwe ayikiniraho avuga ko yatunguwe no kubona iyi baruwa ndetse bakomeje kwibazwa aho bazajya bakirira imikino ya Shampiyona.
Icyemezo cyo guhagarika Stade Umuganda kije nyuma yuko hari ibaruwa Minisiteri ya Siporo yandikiye FERWAFA ku wa 29 Ukwakira 2021, ibameshya ko Stade Umuganda itemerewe kwakira imikino bitewe n’uburyo yangiritse.
Minisiteri ya Siporo kandi yandikiye Akarere ka Rubavu ku wa 11 Ugushyingo 2021 isaba ko Stade Umuganda yangiritse kubera ibiza by’imitingito igomba kubanza gusanwa kugira ngo yongere yakire imikino itandukanye, bitaba ibyo igakomeza guhagarikwa.
Nubwo kugeza ubu FERWAFA yahagaritse iki kibuga amakipe yo yifitiye icyizero ko ibiganiro biza kurangira bakomorewe cyane ko bagomba kurara bagiranye ibiganiro na Ferwafa, mu gihe abayobora aya makipe batangaza ko ikibuga cya Stade Umuganda n’inkengero zacyo zirimo n’ahagenewe kwicara abafana hatigeze hangirika cyane ndetse hakaba hari ibyumba bibiri by’urwambariro rw’abakinnyi bitigeze byangirika.
Ubwo twakoraga iyi nkuru inzego zitandukanye zo mu Ntara y’Iburengerazuba by’umwihariko abayobozi bo mu Karere ka Rubavu bari mu nama yiga kuri iki kibazo cyo guhagarika iyi Stade.
