Yanditswe na NIMUGIRE Fidelia
Umusirikare wa FARDC ufite ipeti rya Lt Col hamwe n’abarwanyi ba ADF 4 baguye mu gico umutwe wa ADF wateze imodoka y’igisirikare cya Congo(FARDC) mu gace ka Mbau-Kamango mu mujyi wa Beni.
Iki gico cyagabwe kuwa 14 Nzeri 2022. Umuvugizi wa Operasiyo Socola 1, Cpt Anthony Mwalushayi yemeje ko mu baguye muri iki gico harimo n’uwo musirikare.
Cpt Mwalushayi yavuze ko Umusirikare uwishwe ari Lieutenant-colonel, Mbonza Lucien.
Lt Col Mbonza yari ashinzwe Ibikoresho bya gisirikare muri Rejima ya 3402 ikorera i Beni.
Yagize ati: “ Abarwanyi ba ADF bateze igico abasirikare ba FARDC. Nyuma yo kurasana bagati y’ingabo za Leta n’aba barwanyi, iyi mirwano yaguyemo Lt Col Mbonza Lucien wa FARDC, mu gihe ku ruhande rw’ibyihebe hapfuye bane.”
Cpt Mwalushayi yakomeje avuga ko abarinzi ba Lt Col Mbonza bakomeje kurasa ibi byihe kugeza babigejeje aho byari biturutse mu ishyamba rya Virunga.
Iki gico umutwe wa ADF wagabye ku modoka ya FARDC, kije gikurikira igitero baherukaga kugaba mu baturage kuwa 13 Nzeri 2022 cyaguyemo abasivili 2.
