Mutungirehe Samuel
Depite Mukabunani Christine yatangaje ko hari itegeko ririmo kuvugururwa mu Nteko ishinga amategeko umutwe w’abadepite, ribaha urubuga rwihuse abadepite rwo kugira icyo batangaza ku birimo kubangamira abaturage muri ako kanya kuko irisanzweho ryasabaga ko binyura mu nzira ndende.
Yabitangaje mu kiganiro na Radio 10 mu gitondo cyo kuri uyu wa Mbere agira icyo asobanurira abaturage bamwe bakomeje kwibaza impamvu abadepite bafata nk’Intumwa za Rubanda bakomeje kuruca bakarumira ku bintu bimwe na bimwe bibangamira abaturage bikarindira ko Umukuru w’igihugu ari we uzabifataho umwanzuro amaze kubona ko nta rwego na rumwe rugize icyo rubivugaho.
Hon. Mukabunani yabanje kwisegura ku bakurikiye radio ko atari umuvugizi w’inteko ariko asobanura hari ikirimo gukorwa nabo bategereje kugira ngo Abanyarwanda bajye babona uruhare rw’inteko mu buvugizi ku bibangamiye abantu ako kanya.
Yagize ati, "Ubu itegeko ririmo riravugururwa ku buryo ibyo bita nyine Question d’actualité, ni ukuvuga ikibazo kigezweho, muri iri tegeko turimo kuvugurura ku mikorere y’abadepite harimo ko abadepite bazaba noneho bafite umwanya ku buryo ikintu cyabangamiye abaturage, cyabyutse kivugwa abantu bacyinubira hazaba hari uburyo noneho bwo guhita abantu bakivuga."
Yakomeje asobanura ko mbere kugira ngo abadepite bagire ubuvugizi bakorera rubanda byansaba kubanza bakandikirwa nk’umudepite igihe umuturage amutumye cyangwa se abafite ikibazo bakandikirwa inteko yose binyuze ku muvugizi, bigatwara iminsi.
Ati "Ubwo mu itegeko bashyizemo ikibazo kigezweho ikidutindije ni uko ritorwa rikemezwa, nirimara gusohoka ibintu ndabona njye ko biza bizajya mu buryo noneho, ikibazo cyabangamiye abantu uyu munsi tuzaba dufite uko duhita tukivuga tutishe itegeko nagato."
Mu buhamya bwe, Hon. Mukabunani yavuze nawe ko impinduka Polisi ishami ry’umutekano wo mu muhanda zari zakozwe ku muvuduko w’ibinyabiziga nawe byamugezeho, baramwandikira ngo yarengeje umuvuduko, gusa ashimira Perezida Kagame ko yagize icyo abikoraho kuko byari bibangamiye abatwara imodoka na moto cyane cyane mu Mujyi wa kigali.
Hashize iminsi bamwe mu baturage batangaza ko babangamiwe n’ibibazo bigera kuri bibiri, ari byo kwandikirwa umuvuduko urenze km40/h mu Mujyi wa kigali ndetse n’ikibazo nubu bagitegereje umucunguzi cy’izamuka rya hato na hato ry’ibiciro bya gaze.
Gusa kuri iki cy’umuvuduko w’imodoka na moto cyo mu minsi ishize Perezida Kagame yagitanzeho umurongo ubwo yavugaga ko inzego zibishinzwe zikwiye kugira igikorwa cyane ko yabisesenguye nko kushaka kongera amafaranga cyane mu gushyiraho ibyo bihano ku bandikirwa ko barengeje umuvuduko wa km40/h.
Bamwe mu baturage bagize batanga ibitekerezo byabo kuri icyo kiganiro bavuze ko hakwiye kujyaho urwego rushinzwe kuvuganira abaturage mu gihe inzego za leta zishyizeho imyanzuro runaka bikagaragara ko irimo kubangama aho gukemura ikibazo kigambiriwe.
Uwiyita @jorijiBagume2 yanditse ku rubuga rwa Twitter ati, "Mwaramutse oswakim na Rameshi, ubundi niba harabantu barya amafaranga yubusa nabadepite. Ubuse kombona ibibazo byose ari president ubikemura none ubwo bamaze iki??
Bazashobore baveho kbs!!"
Mu bahamagaye barimo abasabye ko bagira igikorwa n’igiciro cya gaze kikigwaho kikagabanuka kuko izamuka ryacyo rishobora gukoma mu nkokora gahunda y’Igihugu yo kubungabunga amashyamba n’ibidukikije muri rusange.
