Guverinoma ya Ethiopia yasabye Ishami ry’Umuryango w’Abibumbye ryita ku Buzima, OMS, gukora iperereza ku muyobozi waryo, Dr Tedros Adhanom Ghebreyesus, ku makuru yatangaje bita ko ayobya n’imyitwarire idahwitse mu ntambara igishyamiranyije Ethiopia n’Intara yayo Tigray.
Uyu Dr. Tedros Adhanom Ghebreyesus nawe ubwe akomoka mu ntara ya Tigray akaba yarahoze ari Minisitiri w’Ubuzima muri Guverinoma ya Ethiopia mbere yuko ajya kuyobora ishami rya OMS.
Guberinona ya Ethiopia iyobowe na Dr. Abiy Ahmed imushinja kwivanga mu bibazo by’igihugu cye birimo n’iby’umubano gifitanye na Eritrea.
Guverinoma ya Dr. Ahmed yatanze impuruza ko Dr. Tedros ashobora kwangiza isura y’umuryango mpuzamahanga ahagarariye.
BBC yanditse ko mu byo Dr. Tedros azizwa harimo ko muri iki cyumweru yavuze ko imibereho yo muri Tigray, agace kashegeshwe n’intambara, bumeze nk’ubw’ikuzimu aho yashinje Guverinoma kubangamira ibikorwa byo kugeza imiti muri aka gace.
Mbere Ethiopie yari yashinje Dr Tedros gushyigikira inyeshyamba za Tigray mu bikorwa by’intambara nubwo we yabihakanye.
