Mutungirehe Samuel
Ikigo cy’Uburenganzira n’iterambere mu biyaga bigari (GLIHD) cyahurije hamwe imiryango imwe mu zigize sosiyete sivile nyarwanda, iharanira uburenganzira bwa muntu n’ubw’abagore n’inzego za Leta nka minisiteri y’Ubutabera basuzumira hamwe Imyanzuronama (Recommendations) u Rwanda rwahawe ku bijyanye n’amasezerano nyafurika aharanira uburenganzira bw’umugore, azwi nka "Maputo Protocol" bityo bizabafashe gukora raporo iherekeza iya leta mu isuzuma ritaha.
Ni inama yabereye i Kigali kuri uyu wa Kane tariki ya 2 Ukuboza 2021, yasuzumiwemo imyanzuro 6 u Rwanda rwahawe mu myaka 3 ishize, igihe ruherutse gutanga raporo y’uko uburenganzira bwa muntu buhagaze mu gihugu, mbere yuko ruzongera kujya kugaragariza ibindi bihugu uko uburenganzira bwa muntu by’umwihariko ubw’abagore mu nzego zose buhagaze, my kwezi kwa Gatanu umwaka utaha.
Umuyobozi wungirije w’ikigo GLIHD, Me. Umulisa Husna Vestina, yavuze ko bari gusesengura iyo myanzuronama u Rwanda rwahawe kugira ngo bafatanye kuyisubiza.
Akomeza agira ati "Murabizi Leta, abafatanyabikorwa bayo ni sosiyete sivile, ni yo mpamvu twicaye hamwe ndetse turi bunasoze dukoze ishyirwa mu bikorwa ry’iyo myanzuro. Turasoza iyi nama twafashe umurongo kugira ngo dufashe Leta gushyira mu bikorwa ibyo yiyemeje.
Niba tuvuge njyewe nka sosiyete sivile runaka nkora ku ku burenganzira bwa muntu nita ku bana, nita ku bagore, iyo myanzuronama irimo irebana nabyo turagenda dufatanya kubisubiza. Nta handi bashobora gukura ibisubizo usibye muri twebwe nka sosiyete sivile ndetse n’inzego za Leta."
Ku ruhande rwa Leta, Umurungi Providence wari uhagarariye ishami rishinzwe ubutabera Mpuzamahanga n’ubufatanye mu by’amategeko yavuze ko ibizava muri myanzuro yabo nka sosiyete sivile bizabafasha igihe igihugu kizaba kijyanye uko cyashyize mu bikorwa imyanzuronama cyahawe.
Ati "Ni Abanyarwanda bamwe twese dukorera, nta ba sosiyete sivile nta n’aba leta, byose hamwe rero no ukuvuga ko ari ibikorwa bibakorerwa. Niba babajije bati ese abagore bari muri za mikorofinanse (ibigo by’imari iciriritse) ni bangahe, ese amategeko yahinduwe kugira ngo uburenganzira bw’abagore bwinjizwe my mategeko y’u Rwanda cyangwa se aho byari biri bisa n’ibibangamye n’ibyo amategeko mpuzamahanga asaba hakozwe iki. Ibyo byose no ibyo dukorana, guverinoma igakora raporo ukwayo na sosiyete sivile zibishaka zigakora izayo ariko byose tubikora mu bufatanye."
Kimwe mu byo imiryango iharanira uburenganzira bwa muntu n’ubw’abagore iri bukemure cyagaragaye nk’inenge muri raporo ziheruka ni ikijyanye n’imibare y’ibiba byakozwe n’iyo miryango itandukanye mu gihugu ariko ntibigatagazwe mu gipimo gifatika kuko nta mibare ibisobanura.
Imwe mu miryango igize sosiyete sivile ikora ku bijuanye n’uburenganzira bwa muntu n’ubw’abagore yaguze ko hari byinshi bakora kandi byiza, ndetse binagaragarira my baturage ari nabo bagenerwabikorwa babo kandi bigiye kujya bishyirwa muri raporo zikorwa ziherekeza iya Leta.
