Yanditswe na Mutungirehe Samuel
Habura iminota mike ngo abimukira n’impunzi ba Mbere bahaguruke mu Bwongereza berekeza i Kigali mu Rwanda, indege yari igiye kubajyana irahagaritswe, nyuma y’icyemezo cy’Urukiko rw’i Burayi rushinzwe uburenganzira bwa muntu (ECtHR).
Uyu ni umugambi w’Ubwongereza n’u Rwanda wanenzwe n’abatari bake kugeza ku Muryango w’Abibumbye ubwawo, nubu ukibinenga, ko bihabanye n’uburenganzira bwa muntu cyane cyane nk’impunzi n’abimukira bari bazi aho bashaka kujya gushakirayo amaramuko bagahatirizwa gusubira mu gice cy’ibihugu bikennye nk’ibyo baba bahunga.
Kugeza ubu u Rwanda rwari rugitsimbaraye ku gushyira mu bikorwa iyo gahunda, rwaraniteguye, ndetse uyu munsi ababugizi ba Guverinoma bavuze ko nta gisibya kuwakitambika iyo gahunda kuko ibihugu byombi byayemeranyijeho.
BBC yanditse ko ari abantu 7 bari bagiye guhaguruka mu ndege yigenga ya Boeing 767 ku kibuga cya MoD Boscombe Down, hafi na Salisbury.
Minisitiri w’Ubutegetsi bw’Igihugu na polisi mu Bwongereza Priti Patel, byamubabaje agira ati, “Birababaje, ariko ntibirangiriye aho kandi imyiteguro y’indi ndege iratangiye”.
Abagenzi bose bahise basohorwa mu ndege igitaraganya mu gihe yari guhaguruka saa 22h30′.
