Inteko ishinga amategeko ya Iran yatoye umushinga wemerera leta ya Iran gufunga umuhora wa Hormouz, usanzwe unyuzwamo ibikomoka kuri Peteroli byinshi biva mu burasirazuba bwo hagati byerekezwa hirya no hino kw’isi.
Ibi inteko ya Iran yaraye ibitoye mu rwego rwo kwihimura ku bitero biherutse kugabwa na USA mu bice bitatu bikomeye byo muri Iran bisanzwe bitunganyirizwamo ubutare bwa Nucleaire.
Impuguke mu bukungu zivuga ko gufunga uyu muhora wa Hormouz bishobora gutuma habaho itumbagira ridasanzwe ry’ibikomoka kuri Petroli kuko ibihugu nka Iraq,Kuwait, Qatar na Emirati z’Abarabu bizabagora kuyinyuza ahandi.
Umushinga wo gufunga uwo muhora wamaze kwemezwa n’inteko ishinga Amategeko; kurubu ukaba wohererejwe akanama gashinzwe amahoro n’umutekano muri Iran ngo kawufateho umwanzuro.
Na none gufunga uyu muhora bishobora guhindura Iran umwanzi ukomeye w’ibihugu byo mu karere mu bigendanye na Politiki, ariko bikanagira inyungu ihambaye kuri Iran kuko byazamura ubucuruzi bwayo n’ubushinwa.
Umuhora wa Hormouz niwo nzira yonyine isohoka mu kigobe cy’abaperisi, ukaba unyuzwamo ibikomoka kuri Peteroli bingana na 20% by’icuruzwa kw’isi hose bikaba byagira ingaruka mu gihe Iran yaba iwufunze.
Ku rundi ruhande ibihugu nka Qatar bishobora kubihomberamo ugendeye ku kuba ari igihugu cya mbere gicuruza Gaz yahinduwe Amazi (LNG) ingana na 20% y’icuruzwa kw’isi hose, bikaba byanatera icyuho gihambaye mu bigendanye n’ingufu mu burengerazuba bw’isi.
