Banki Nkuru y’Igihugu yatangaje ko ubukungu bw’u Rwanda bukomeje kuzamuka, by’umwihariko bikaba byagizwemo uruhare na banki zatanze inguzanyo ndetse n’ikigero cy’izitishyurwa cyagabanutse ugereranyije n’indi myaka yashize.
Hagati ya Mutarama na Nzeri, inguzanyo zatanzwe n’amabanki zingana na miliyari 942 Frw ugereranyije na miliyari 791 Frw zatanzwe mu gihe nk’icyo mu mwaka ushize wa 2020.
Kugeza muri Nzeri, inguzanyo zitishyurwa neza zari kuri 5,1% bigaragara ko zagabanutse ugereranyije n’uko mu mwaka ushize zari kuri 5,2%.
Ubukungu bw’ibigo by’imari iciriritse nabwo bwarazamutse aho muri Nzeri bwari ku kigero cya 16,1% bingana na miliyari 397 Frw zivuye kuri miliyari 342 Frw zo mu 2020.
Mu nguzanyo zatanzwe n’ibigo by’imari, izitishyurwa neza ziri kuri 6,4%.
Inguzanyo ziyongereye, Banki Nkuru y’Igihugu isobanura ko ziri mu ngeri nk’Urwego rw’Ubwubatsi cyane inzu z’ubucuruzi, inganda hamwe no mu rwego rw’ubukerarugendo by’umwihariko hoteli.
Urwego rw’ubwishingizi rwo rwagize urwunguko ku buryo ibihombo byagabanutse ubukungu bwabwo bukagera kuri 16,5% rukagira agaciro ka miliyari 662 Frw kugeza muri Nzeri 2021.
Imisanzu y’ubwiteganyirize yatanzwe muri RSSB nayo yazamutseho 25% igera ku gaciro ka miliyari 1200 Frw mu gihe umwaka ushize imisanzu yari yagabanutse ku kigero cyo hejuru kubera abantu benshi babuze imirimo.
Kimwe mu bintu bikomeye byaranze ubukungu bw’u Rwanda mu myaka ibiri ishize, harimo ikijyanye n’ikoreshwa ry’ikoranabuhanga mu kwishyura no kwishyura.
Urugero ni uko ikigero cyo kwishyurana hifashijwe telefoni cyazamutseho 20%, amafaranga yishyuwe agira agaciro ka miliyari 2,5 Frw.
Ni mu gihe guhererekanya amafaranga kuri banki hifashishijwe ikoranabuhanga nabyo byazamutse ku kigero cya 90% mu gihe kubitsa amafaranga hakoreshejwe telefoni byo byazamutse ku kigero cya 47%.
Imwe mu mbogamizi zabayeho ni ubwo MTN Rwanda yatangazaga ko igiye kujya ikata 0,5% ku bantu bakoresha MoMo Pay. Byatumye agaciro k’amafaranga yahererekanwaga mu kwishyura hifashishijwe ubwo buryo agabanuka hafi icya kabiri.
Guverineri wa Banki Nkuru y’u Rwanda, John Rwangombwa, yavuze ko izi mpinduka zari zitezwe, aho ubu hari gahunda yo gutangira kwigisha abantu ku buryo bumva ko serivisi zose batazazibonera ubuntu.
Yavuze ko muri Afurika yo Munsi y’Ubutayu bwa Sahara, ubukungu buzazamuka ku kigero cya 3,7%.
Ubukungu bw’u Rwanda nabwo bukomeje kuzanzamuka aho nko mu gihembwe cya kabiri cy’uyu mwaka bwazamutse ku kigero cya 20,6% mu gihe umwaka ushize mu gihembwe nk’icyo ubukungu bwari bwamanutse ku kigero cya -12,4%.
Ntabwo imibare y’igihembwe cya gatatu irajya hanze gusa BNR isobanura ko mu bigaragara ubukungu bw’u Rwanda buzakomeza kuzamuka.
Uku kuzamuka ahanini gushingiye ku ngamba BNR yafashe zigamije kuzamura ubukungu ubwo icyorezo cyatangiraga, bikaba binajyanye na none n’uburyo u Rwanda ruri gushyira imbaraga mu gukingira abaturage barwo.
