Abanyeshuri b’abakobwa 34 bo mu ishuri ryisumbuye rya Nasokol mu Burengerazuba bwa Pokot muri Kenya, birukanwe kuri uyu Kabiri bazira kugira amanota make mu ishuri.
Umuyobozi mushya w’iri shuri niwe wategetse ko aba bakobwa biganjemo abo mu mwaka wa Mbere n’uwa Gatatu bakina umupira w’amaguru birukanwa.
Aba bakobwa bazanwe n’umuyobozi wari usanzwe kuri iki kigo kuko bakina umupira w’amaguru, bakaba bigaga batishyura amafaranga y’ishuri ndetse no gutsindwa mu ishuri ntibibe ikibazo.
Daily Nation yatangaje ko umuyobozi mushya avuga ko ibyo bigomba guhinduka ndetse umwe yavuze ko yababwiye ko bajya gushaka andi mashuri yashyize imbere imikino.
Bamwe mu babyeyi b’aba bana bavuze ko batari basanzwe bishyura amafaranga y’ishuri ariko umuyobozi mushya w’ikigo yabahamagaje kuri uyu wa mbere ababwira ko amabwiriza mashya asaba abanyeshuri bose kwishyura amafaranga.
Umubyeyi witwa Thomas Wabomba yagize ati “Twaje ku ishuri mu gitondo ariko kugeza nimugoroba umuyobozi wungirije yatubwiye ko tugomba kwishyura amafaranga y’ishuri cyangwa abana bacu tukabajyana ku bindi bigo.
Uwitwa Saulo Tukoi yakomeje agira ati “ Twagerageje kumvikana n’umuyobozi uko twatangira kwishyura amafaranga y’ishuri ariko aratsimbarara avuga ko tujyana abana bacu ahandi.”
Abenshi muri aba banyeshuri bagiye bakurwa ku bigo bigagaho mbere ku bw’impano yo gukina umupira w’amaguru bakazanwa aha kuri Nasokol Secondary School, bizezwa ko bazajya biga batishyura amafaranga y’ishuri.
