Abasirikare, abapolisi n’abasivile baturutse mu bihugu birindwi byo ku mugabane wa Afurika bateraniye mu Rwanda mu mahugurwa yo kubongerera ubushobozi bwo ku rwego rwo hejuru mu kurinda abana kujya mu gisirikare no mu mitwe yitwaje intwaro.
Ni amahugurwa ari kubera mu karere ka Musanze mu Majyaruguru y’u Rwanda, yatangiye kuri uyu wa Mbere, tariki ya 25 Nzeri 2023.
Ni amahugurwa yateguwe na Dallaire institute, ikigo cyaahinzwe na Romeo Dallaire wabonye byinshi muri Jenoside yakorewe Abatutsi ubwo yari mu butumwa bwa Loni mu Rwanda, MINUAR.
Abitabiriye aya mahugurwa uko ari 20 bamwe muribo babwiye umunyamakuru wa mamaurwagasabo ko biteguye kungukiramo byinshi bazifashisha bahugura bagenzi babo bo mu bihugu baturukamo.
IP Claudine Uwimana ni umwe muri baturutse muri Polisi y’u Rwanda, yavuze ko hari byinshi bazungukiramo bijyanye no gukomeza gukumira ikibazo cyo gushora abana mu makimbirane y’intambara muri Afurika.
Yagize ati: "Aya mahugurwa twatangiye uyu munsi ni amahirwe kuri twebwe, ni ubumenyi bwiyongera ku bundi, icyo twiteze ni hko ubwo bumenyi twongerewe tuzabukoresha ku bantu bajya mu butumwa bw’amahoro, bwaba ubw’Afurika cyangwa umuryango w’ubumwe bw’abibumbye, kuko aho dukorera ni ibihugu biba bifite intambara, aho usanga abana bahohoterwa ndetse imitwe yitwaje intwaro iba igira ngo yungukire kuri ayo mahirwe ikoreshe abana, ubwo rero twibaza ko yaba umusirikare, umupolisi ndetse n’umusivile ugiye muri ubwo butumwa afite ubwo bumenyi bw’uburyo yitwara imbere y’abo bana bishobora gufasha kugira ngo uwo mwana ntasubire muri iyo mitwe yitwaje intwaro."
Undi ni Brig. Gen Angelos Dhal Agok waje aturutse mu gihugu cya South Sudan, ashimingira ko hari byinshi bazungukira muri aya mahugurwa.
Aragira ati: "Mu gihe cyashyize ubwo twari mu ntambara yo kubohora igihugu hari ubwo abana bakoreshwaga mu ntambara, ariko kuri ubu tukaba turi mu bihugu byahagaritse ibyo bikorwa, ahubwo dufite umugambi wo kurinda abana kujya mu gisirikare, kandi ibi byose kugira ngo tubigereho bisaba imbaraga zikomeye ku bufatanye na Dallaire institute, aya mahugurwa rero tuzayungukiramo byinshi ."
Umuyobozi wa -African Centre Of Excellence yashinzwe na Dallaire institute ifite icyicaro muri Canada , Maj. Gen (Rtd) Ferdinand Safari ubwo yatangizaga aya mahugurwa ku mugaragaro yavuze ko ikibazo cy’abana bajyanwa mu ntambara aho kugira ngo kigabanuke kigenda cyiyongera.
Aragira ati: "Ikibazo cy’abana bajyanwa mu ntambara aho kugira ngo kigabanuke kigenda cyiyongera; ngira ngo nkuko mugenda mubikurikirana imidugararo muri Afurika igenda yiyongera, uko yiyongera ntabwo isiga cyane abaturage bakunda kugirwaho ikibazo nk’abagore n’abana. Ariko abana ugasanga bakunda gufatwa bakajyanwa mu mitwe yitwaje intwaro batanabishaka, kenshi na kenshi ugasanga nyine ni ikibazo gikomeye cyane muri Afurika, ngira ngo iyo urebye Afurika yose hari intambara nyinshi, izo ntambara zose uko zihari hafi ya zose zikoresha abana."
Uyu muyobozi yakomeje agira ati: "Aya mahugurwa agamije gutanga ubundi bumenyi bwo hejuru, iki kiciro cy’agatatu ni ukugira ngo tubone abasobanukiwe cyane bashobora koherezwa mu bindi bihugu kwigisha abandi nko muri Mozambique, Cameron n’ahandi, nicyo aya mahugurwa agamije ku buryo bajya ahari ibyo bibazo byose nababwiye."
Ibihugu byitabiriye aya mahugurwa birimo U Rwanda, Democratic Republic of Congo, Mozambique, Nigeria, Sierra Leone, South Sudan, na Uganda, azamara iminsi ine mu kigo cy’Igihugu cy’Amahoro cya Rwanda Peace Academy i Nyakinama, mu karere ka Musanze.
Yanditswe na Jean Claude Ndayambaje
