Urwego rw’Igihugu rw’Ubugenzacyaha, rutangaza ko mu myaka itatu ishize rwohereje mu Bushinjacyaha dosiye 2643 z’abakurikiranyweho ruswa zarimo abantu 5507.
Raporo ya RIB yo kuva mu 2020 igaragaza ko mu 2020-2021, RIB yohereje amadosiye 885 yarimo abantu 1597, mu 2021-2022 hoherezwa dosiye 894 ziregwamo abantu 2205 mu gihe mu mwaka wa 2022-2023 hatanzwe dosiye 864 ziregwamo abantu 1705.
Mu biganiro byahuje inzego z’ubutabera n’itangazamakuru, Umunyamabanga Mukuru wa RIB, Col (Rtd) Jeannot Ruhunga, yavuze ko uru rwego rukurikirana buri wese rutitaye ku rwego ariho, kuva ku muturage usanzwe kugeza kuri minisitiri n’undi wakekwaho ruswa rumufiteho ububasha.
Yagize ati, "“Mu kurwanya ruswa nta muntu uri hejuru y’amategeko, murabizi mu magororero hafungiweyo ab’ingeri zose haba abo ku rwego rwa ba minisitiri n’abandi bose muzi. Ntavangura ribaho mu gukurikirana ibyaha bya ruswa.”
Yavuze ko mu myaka itatu ishize, n’abantu bakora mu nzego z’ubutabera bakurikiranywe barimo abacamanza babiri, abashinshacyaha batanu, abahesha b’inkiko batanu, abunganizi batatu n’abagenzacyaha 16.
Perezida w’Urukiko rw’Ikirenga, Dr Faustin Ntezilyayo, yagaragaje ko nta gihugu gishobora gutera imbere cyaramunzwe na ruswa ari nayo mpamvu ikwiye kurandurwa burundu.
Yasabye abakora mu nzego z’ubutabera kwiheraho mu kurwanya ruswa mu rwego rwo kubaka icyizere bagirirwa mu gutanga ubutabera buboneye.
Yashimangiye ko nta muntu n’umwe uri hejuru y’amategeko by’umwihariko ku byaha bya ruswa.
Ku rundi ruhande, Umushinjacyaha Mukuru w’u Rwanda, Aimbable Havugiyaremyi, yagaragaje ko impamvu abantu bakora mu nzego z’ubutabera bakigaragarwaho na ruswa harimo n’abatari inyangamugayo.
Ati “Muri izi nzego nabo ni abantu, ntabwo ari abatagatifu. Nk’uko no muri sosiyete muri rusange batari abatagatifu no mu nzego dukorera habamo abantu bagira imyitwarire itari yo ndetse bashobora kugaragarwaho na ruswa.”
Umuryango mpuzamahanga urwanya ruswa n’akarengane, Transparency International, washyize u Rwanda ku mwanya wa 49 ku rutonde rushya rwo kurwanya ruswa, ruvuye ku wa 54 rwariho mu mwaka wa 2022
