Yanditswe na Ndayambaje Jean Claude
Bamwe mu bacururiza mu isoko rya Kijyambere ryitwa "Goico" rya Musanze baravuga ko batazi gukoresha ibyuma byagenewe kuzimya inkongi z’umuriro (Kizimyamwoto), bagasaba ko bahugurwa byimbitse ku buryo bashobora kuzimya inkongi mu gihe zobaye batagombere gutegereza izindi nzego.
Izi mbogamizi bazigaragarije itangazamakuru ryari kumwe n’itsinda ry’abasenateri muri komisiyo y’ububanyi n’amahanga,ubutwererane n’umutekano riyobowe na Hon.Mukakarangwa Clothilde .
Abacuruzi baganiriye n’umunyamakuru wa mamaurwagasabo bavuze ko batazi gukoresha Kizimyamwoto ziri mu isoko, ko bazibona gutyo gusa.
Kanyabugoyi Innocent ni umwe mu bacururiza mu isoko rya Goico yagize ati "Ntabwo abayobozi bigeze badusobanurira uburyo bwo gukoresha iki kintu, habaye impanuka twabigenderamo"
Akomeza avuga ko bahawe amahugurwa kuri ibyo bikoresha barushaho kumva bafite umutekano usesuye.
Akomeza agira ati "Byibuze baduhaye amahugurwa tugasobanukurwa imikoreshereze y’ibi byuma twarushaho kumva dufite umutekano usesuye."
Umutesi Afisa akora ibijyanye n’imirimo y’ubutayeri muri Goico avuga ko nubwo babona ibi bikoresho ariko nawe atazi kubikoresha.
Yagize ati "Turasaba ko babitwigisha, dore nkubu negeranye na Kizimyamwoto ariko ntabwo nzi kuyikoresha; Turasaba inzego bireba ko bazatwigisha kubikoresha ."
Umuyobozi w’isoko rya Goico, Murengera Alex avuga ko hari ikipe yahuguwe y’abashinzwe umutekano n’abakora isuku ndetse n’umuruzi umwe kuri buri boroke, akizeza ko bateganya no kuzahugura n’abandi bacuruzi.
Yagize ati "Nibyo koko ntabwo turabasha guhugura abakorera muri iri soko bose, gusa twahuguye abashinzwe umutekano n’abakora isuku kandi turateganya kuzatangura guhugura n’abandi mu gihe cya vuba"
Hon.Mukakarangwa Colthilde avuga ko iki gikorwa cyateguwe mu rwego rwo kubahiriza amabwiriza ya Nyakubahwa Minisiteri w’intebe 001/2 ryo kuwa 11/7/2014 ajyanye no kurinda no kurwanya inkongi z’umuriro.
Yagize ati "Sena yateguye iki gikorwa ariko by’umwihariko ni komisiyo y’ububanyi n’amahanga ubutwererane n’umutekano mu nshingano zayo ndetse dushingiye kuri gahunda ya guverinoma y’imyaka 7 iteganya ko hazaba hariho kurinda umutekano w’abantu ndetse no kurinda inkongi z’umuriro ku baturage."
Hon.Mukakarangwa akomeza avuga ko basanze mu karere ka Musanze mu isoko rya Goico bimeze neza ndetse bajya inama yo kugira ngo aba bacuruzi babisobanukirwe.
Yagize ati "Twasanze ibikoresho bihari aho twabashije gusura, gusa icyo twagiyeho inama nuko bagomba kubisobanukirwa kurushaho."
Uru ruzinduko ruri mu rwego rwo kumenya ibikorwa bya Guverinoma bijyanye no gukumira no kurwanya inkongi z’umuriro hirya no hino mu Gihugu, muri Musanze hagaragaye inkongi 20 kuva mu mwaka wa 2018 kugeza muri uyu mwaka turimo wa 2022.
Ibi bikorwa byatangiye tariki ya 7 Gashyantare 2022, bikomeje kubera mu gihugu hose mu turere 18 twatoranyijwe.
