Alice Umugiraneza
Abagore bakora ubucuruzi buciriritse mu masoko atandukanye yo mu karere ka Musanze barishimira intabwe bamaze gutera kuko bafashe iyambere mu gukorana n’ibigo by’imari bityo bikabafasha kubona amafaranga yo kongera igishoro cy’ubucuruzi kuko bwari bwarazahajwe na covid19.
Bamwe muri bo babwiye mamaurwagasabo.rw ko mbere yo kubona izonguzanyo byari bitaboroheye kuko kubera icyicyorezo cyugarije isi n’uRwanda rurimo cyari cyabateye igihombo gikomeye bituma n’ibigo by’imari biseta ibirenge mu kubaha inguzanyo batari gukora neza.
Mukarwambari Immacule akorera mu isoko ry’biribwa rya Musanze yagize ati "Mu by’ukuri covid19 yahungabanije abantu benshi, njyewe nabonaga nta cyerekezo mfite kuko twagize n’igihe cya Guma mu Rugo tukarya tudakora, nkibaza Guma mu Rugo nirangira uko bizagenda abanyeshuri barimo gusubira ku ishuri ntagicuruza bikanyobera. Umugabo wanjye bari bamugabanyije mu bakozi nta kazi yari afite, urumva ko ntahandi twarebaga ni ahangaha mu byo ncuruza hari hadutunze.
Mbere ya covid19 nari mfite igishoro cya 2.000 000frw ariko kubera kurya ntakora nasigaranyemo igishoro cya 500 000frw, urumva ko ntaho nari nsigaye."
Mukarwambari akomeza avuga ko nyuma ya kuva muri Guma mu Rugo nibwo bababwiye ko hari amafaranga ari kuri sacco ari gutera inkunga ubucuruzi buto buto bwagizweho ingaruka na covid19.
Ati "Nibwo nagiye kubaza icyo bisaba, bansaba ko mba mfite ipatante itarengeje imyaka 2, ingwate TN number, narabitanze amafaranga barayampaye 1.000 000 frw yishyurwa mu myaka 2 yunguka 8%. Ubwo kuri miliyo imwe wunguka 40 000frw ku kwezi birengaho duke, nahise nongera kwiyubaka ndongera ndarangura ubu birimo biragenda."
Akomeza agira ati "Kugira ngo kwishyura bitazangora nukwifashisha ibimina kuko guterura ibihumbi 40000 byangora, ariko ku munsi ngize ayo nshyira mu kimina ku kwezi bakayampa kwishyura biranyorohera."
Uwase Sandrine nawe akora ubucuruzi bw’ibikoresho bisimbura ibishaje, piece de rechange, mu Mujyi wa Musanze yagize ati "Iyi nguzanyo yaramfashije cyane kuko covid19 yarambombeje, kuko ayo nari narashoye yose ni nkaho yose yahiriyemo. Mbere ya covid19 nari mfite igishoro cya milliyoni eshatu ni gice ariko muri Guma mu Rugo kuko twe tudacuruza ibiribwa ntitwari twemerewe gukora, urumva ko twaryaga tudakora, aho tugarukiye mu kazi ntakintu nari nsigaranye, nibwo numvise ko hari amafaranga ari kuri sacco ariko atangwa na BDF, nahise njyayo babwira ibisabwa kugira ngo ubone ayo mafaranga, narabitanze ibyo bansabaga nyuma y’ukwezi amafaranga agera kuri 1000 000 narayahawe."
Akomeza avuga ko nyuma yo guhabwa ayo mafaranga yahise yongera kurangura ibyo yari yarabuze uko arangura kubera ubushobozi buke, ubu nibwo arimo gukora cyane kugirango arebeko yasubira ku kigero nkicyo yahozeho.
Ibigo by’imari byo bivuga ko byashyizeho igabanuka ku nyungu 8% ugereranije n’izindi nguzanyo kugira ngo n’abagore bibonemo. Bihora bishishikariza abagore gukorana nabyo kugira ngo barusheho kwiteza imbere no guhora biheje bumva ko badashoboye.
Uwababyeyi Albertine ni umuyobozi wa ABAMUHOZA SACCO, avuga ko kwemererwa guhabwa iyo nguzanyo hari ibyo ugomba kuba wujuje birimo kuba afite ingwate, ipatante itarengeje imyaka 2,ubucuruzi buzwi,kuba umucuruzi ari inyangamugayo,icyemezo kiriho umukona w’umuyobozi wa kagali.
Ati "Iyo umaze kuzuza ibisabwa turabigenzura twabona ibisabwa byuzuye tukabishyikiriza BDF tugategereza ko baduha amafaranga. Mu by’ukuri ugereranije n’izindi nguzanyo ubona izi nguzanyo zo kuzahura ubucuruzi buciriritse bwagizweho ingaruka na covid19 inyungu iri hasi cyane kuko ni 8% mu gihe izindi nguzanyo ari 18% harimo itandukaniro rinini cyane."
Akomeza agira ati" kugeza ubu ubwitabire burahari kuko twatanze amatangazo ku ma Radio ndetse na televiZiyo.Ikindi nuko izinguzanyo harimo ibyiza ko utangira kwishyura nyuma y’amezi 3 ubonye ayo mafaranga."
ABAMUHOZA Sacco iherere mu mugi wa Musanze ho mu murenge wa Muhoza abacuruzi bakora ubucuruzi buciriritse, bamaze kwitabira gufata inguzanyo yo kuzahura ubucuruzi buciriritse bwagizweho ingaruka na covid19 ni 60 muribo 11 n’abagore mugihe abagera kuri 40 batanze ubusabe bwabo.
