Umugiraneza Alice
Abanyeshuri na babyeyi ndetse n’abarezi barerera ku Ishuri ribanza rya Bukane riherereye mu karere ka Musanze, umurenge wa Musanze, batangaza ko gahunda ya leta yo kugaburira abana bo mu mashuri abanza ku ishuri igiye guhindura imyigire y’abana kuko byari imvune ku bana bakoraga urugendo runini bigatuma n’imyigire yabo idatanga umusaruro uhagije.
Abanyenyeshuri biga ku mashuri abanza rya Bukane ryo mu Murenge wa Musanze, bavugako iyi gahunda yaje ari nk’igisubizo cyabo kuko mbere byari bibagoye gukora ingendo zirenze enye k’umunsi.
Nshuti Blaise na Urakoze Chance biga mu mwaka wa 6 w’amashuri abanza, babwiye mamaurwagasabo.rw ko gahunda yo kurira ku ishuri bayishimiye cyane.
Nshuti Blaise ati "Hari byinshi yaje gukemura; nk’ubu umuntu iyo yatahaga akagera iwabo agasanga wenda ntabahari yahitaga yigumirayo cyangwa akagerayo agasanga ntibirashya akabitegereza bigashya cyangwa rimwe na rimwe akaza atariye mu ishuri akaba ari gusinzira."
Akomeza avuga ko ibyo byatumaga umwana uhuye n’icyo kibazo yiga nabi, ntafate amasomo.
Irakoze Chance agira ati "Iyi gahunda nabonye idufasha byinshi kuko nka ba bandi babaga babwiriwe iwab o badafite ibyo guteka ubungubu tubona ibyo kurya."
Gusa aba bana bavuga ko nubwo iyi gahunda igiye guhindura mu myigire yabo ariko hakirimo imbogamizi.
Bagize bati "Bomgere amashyiga kuko turi kurya dutinze, ibikoresho bidahagije ndetse n’abakozi badahagije kuko birimo gutuma hari ama saaha atubera ipfabusa dutegereje kurya kandi twakagombye kuba turi kwiga."
Ababana Bose bagaruka ku kugura ibikoresho bihagije no kongera abakozi kuko nubwo ibintu byose bitarajya ku murongo neza iyigahunda yatumye tuba turi hamwe. Hari n’abana batahaga bakajya kurya mu rugo iwabo bagasanga bitarashya cyangwa ntanibihari bigatuma nyuma ya saa sita usanga barimo gusinzira mu ishuri.
Abarimu bigisha mu Ishuri Ribanza rya Bukane bavuga ko gahunda yo kurira mu kigo babona hari ibyo ije gukemura byasaga nk’ibyaburiwe igisubizo.
Bizimana Patrick ni umwarimu wigisha mu mwaka wa gatandatu muri iki kigo, yagize ati "Mu byukuri twebwe iyi gahunda leta yashyizeho twebwe twari twarabitangiye kera kuko twabitangiye dushingiye ku banyeshuri twari dufite ubona ko batishoboye n’abandi batahaga kure. Rero urumva ko twebwe bije bisanga hari ubumenyi bukeya dufite mubijyanye no gutekera abana ku ishuri."
Akomeza avugako kurira hamwe kw’abanyeshuri bigiye kubafasha kwesa imihigo, bagatsindisha neza.
Ati "Kurira mu kigo, bose bagatahira rimwe bizatuma n’uburere bwabo bwitabwaho, kuko hanze aha hari abantu bafite imico mibi, babashukashuka ariko ntibizongera kubaho ukundi."
Ababyeyi barerera mu ishuri ribanza rya Bukane nabo bavuga ko ibyo babonaga ari ikibazo kibakomereye. bose intero ni imwe, bati leta, umubyeyi udahwema kubareberera yabikoze!
Rukurungu Karibwami yagize ati "Iyi gahunda ni ntagereranwa kuko baratworohera, uko umuntu yifite niko bamutwara, iyo ufite ibyo wejeje byaba ibirayi, ibishyimbo, ibigori n’ibindi urabizama bakabigenera agaciro."
Ingabire Vode nawe ati "Buri kwezi umubyeyi atanga amafaranga 5000frw, ugereranije ku munsi ni 250frw. Waba wishyuye cyangwa ntayo ufite umwana ntabwo ahezwa nawe afata ifunguro nk’abandi."
Bakomeza bashishikariza abandi babyeyi bagenzi babo ko bagomba gufata iya mbere gushyira mu bikorwa iyi gahunda.
Ubuyobozi bw’Ishuri Ribanza rya Bukane ryegamiye ku itorero ADEPR, buvuga ko kurira ku ishuri babifata nk’igisubizo ku bana n’ababyeyi ndetse n’ikigo muri rusange.
Bwanakweri Elidephonse ni Umuyobozi w’iri shuri, yagize ati "Gahunda ya leta yo kugaburira abana twarayishimiye cyane, kuko mbere yuko ijyaho twebwe twari twarayitangiye. Mu 2017 hari abana bake 390 bavuye ku bana 1000 bitewe no kuva mu ishuri no kwimukira ahandi, harimo impamvu ishamikiye ku muryango bakava mu ishuri kubera imirire mibi.
Mu 2018 nibwo twabikoze ku buryo bwagutse aho twagaburiraga abana 500 twarangiza kubagabura tukabajyana mu isomero, ubwo rero kuba leta ibishyize mu mashuri hose bigiye gutanga umusaruro."
Ati "Turimo gukora ubukangurambaga binyuze mu masibo kugira ngo ababyeyi batabyumva babyumve neza bibe 100%."
Yongeye gusaba leta kongera amafaranga 56Frw igenera buri mwana kuko ari makeya ukurikije ibyo leta isaba kugira ngo indyo y’umwana ibe yuzuye.
Umuyobozi ushinzwe uburezi mu murenge wa Musanze, Uwitonze Annonciatha, yabwiye Mamaurwagasabo ko kurira ku ishuri ari gahunda igamije no gukemura imirire mibi mu bana.
Ati "Kurira ku ishuri byaje gukemura imirire mibi mu bana".
Iyi gahunda ya leta yo kugaburira abana bo mu mashuri abanza hari uruhare rwa leta rungana na n’amafaranga 56Frw kuri buri mwana asigaye rukaba uruhare rw’umubyeyi.
