Yanditswe na Ndayambaje Jean Claude
Mu gihe u Rwanda n’Isi yose muri rusange bibuka ku nshuro ya 28 Jenoside yakorewe Abatutsi muri Mata 1994, mu Karere ka Musanze hari hamwe na hamwe inzibutso zibitse imibiri zitarubakwa mu buryo bwiza ku buryo bifuza ko zubwakwa uhageze wese akamenya amateka mabi yaranze Igihugu.
Mu murenge wa Kinigi ni hamwe habereye Jenoside yaranzwe n’ubwicanyi ndenga kamere ndetse ni hamwe hageragerejwe Jenoside yakorewe Abatutsi kuva mu 1990-1994, Abatutsi batangira kwicwa aho bamwe bitwaga ibyitso, akaba ari yo mpamvu basaba ko babonye u Rwibutso ruri Ku rwego rwiza ku buryo na ba mukerarugendo bahagera bakamenya ukuri ku byabaye, byarushaho kuba byagaragaza ukuri ku bitiranya ko Jenoside yatangiye ubwo indege ya Habyarimana yari imaze kugwa.
Rwasibo Pierre, Perezida wa Ibuka mu karere ka Musanze, avuga ko Urwibutso rwa kinigi rugomba gusanwa cyane ko rwegereye amahoteri, abantu bakajya barusura kuko rushyinguwemo abatutsi bishwe kuva muri 1990.
Ashimira akarere ko bumvise ubusabe bwabo Urwibutso rwa Muhoza rukaba rwarubatswe kandi rugezweho ruri ku rwego rwiza.
Rwasibo Pierre yagize ati, "Mbere na Mbere turashimira akarere ka Musanze ko kumvise ubusabe bwacu bakatwubakira urwibutso rwubatse neza ku buryo imibiri itazangirika ndetse turifuza ko n’Urwibutso rwa Kinigi rushyinguwemo Abatutsi bishwe kuva muri 1990 rwakubakwa neza mu buryo bugezweho, hanyuma abashyitsi baba baje muri aya mahoteli bakajya baza kurusura bakemenya ukuri ku marorerwa yabaye mu Rwanda."
Akomeza avuga ko hari abavuga ko Jenoside yatangiye 1994 ubwo indege ya Habyarimana imaze kugwa ataribyo ahubwo muri ako have Jenoside yatangiye kugeragezwa mu 1990 aho bamwe bitwaga ibyitso by’Inkotanyi bakabona rero Urwibutso rwa Kinigi rwubatswe ku buryo buri wese yajya aza akareba akamenya ukuri.
Umuyobozi w’Akarere ka Musanze Ramuli Janvier yavuze ko bateganya kubaka uru Rwibutso rwa Kinigi uko ubushobozi buzagenda buboneka, avuga bahereye ku Rwibutso rw’akarere ka Musanze, ndetse n’izindi nzibutso zigomba kuzubakwa neza.
Yagize ati "Nibyo kuba abaturage babisaba, kandi natwe turabibona ko kariya gace ni ubukerarugendo, gakeneye urwibutso rwo ku rwego rwo hejuru kandi narwo turateganya kuzubuka n’Urwibutso rwa Kinigi uko ubushobozi buzagenda buboneka. Gusa twahereye kuri uru Rwibutso rw’akarere ka Musanze kugira ngo ba mukerarugendo bazabe baza gusura uri Rwibutso narwo rufite amateka yihariye."
Kuri ubu mu karere ka Musanze hari inzibutso za Jenoside yakorewe Abatutsi muri Mata 1994 zigera kuri eshatu, harimo Urwibutso rwa Busogo rushyinguwemo abarenga 280, Urwibutso rwa Kinigi ndetse n’Urwibutso rushya rw’ubatse mu murenge wa Muhoza, ruzaba ruri ku rwego rwiza, ku buryo abaruhukiyemo bazaba bashyinguwe mu cyubahiro bitandukanye n’urwibutso bahoze bashyinguwemo rutari rwubatse neza.
