Yanditswe na Ndayambaje Jean Claude
Mu karere ka Musanze, mu murenge wa Musanze, mu kagari ka Garuka hari ubuvumo bwahindutse ikimoteri gishyirwamo imyanda nyamara busanzwe bukorerwamo ubukerarugendo bwinjiriza igihugu amadovize.
Muri aka karere ni hamwe mu hakunze gusurwa na ba mukerarugendo benshi baba baje gusura ibyiza nyaburanga birimo Ingagi, ubuvumo ndetse n’ibindi bitandukanye gusa iyo ugeze hamwe na hamwe usanga ibi byiza bititabwaho nkuko bikwiye ku buryo usanga bamwe baratangiye no bikoresha ibidakwiye.
Ubwo umunyamakuru wa mamaurwagasabo yageraga muri uyu murenge wa Musanze yatunguwe no kubona hari ubuvumo busanzwe buzwi bunakoreshwa mu bukerarugendo ariko bwahidutse ikimoteri cy’imyanda.
Umunyamabanga nshingwabikorwa w’akagari ka Garuka ubu buvumo burimo, Zirimwabagabo Alphonse yavuze ko atari azi ko hajugunwa imyanda gusa ngo bagiye gushaka umuti w’iki kibazo.
Yagize ati: "Icyo kibazo ntabwo twari tukizi nkuko muri kukitubwira, ariko mu buryo bw’uko mukitugejejeho no kuba natwe twakurikirana ubuvumo ntabwo bukwiye kuba ikimoteri, birasaba ko dushyiramo imbaraga tukajya kwigisha abaturage bahaturiye noneho tukabakumira kumenamo imyanda kuko atari ikimoteri, ariko bakirinda kwanduza ubuvumo."
Uyu muyobozi akomeza agira ati: "Cyane cyane ko ubuvumo buri muri gahunda y’ubukerarugendo kandi bukaba bwinjiza amadovise afasha mu iterambere rw’Igihugu, twari twakoranye inama n’abacuruzi tubabwira ko mu gihe nta kimoteri rusange kiraboneka buri wese yagira umufuka aba agomba gushyiramo imyanda."
Iyo ugeze kuri ubu buvumo bunyura munsi ya kaburimbo y’umuhanda mpuzamahanga unyura Musanze ujya Rubavu usanga abana buzuyemo barimo gutoraguramo amacupa ku buryo bamwe bashobora no kuba bakwanduriramo indwara zitandukanye.
Gitifu w’akagari yatwijeje ko bagiye kuhashyira uburinzi bwo kurinda ubu buvumo ku buryo nta muturage uzongera kumenamo imyanda, mu rwego gukomeza no kubungabunga ibidukikije kubera ko usanga bajugunyamo n’ibikoresho bya parasitike bitabora.
