Yanditswe na Ndayambaje Jean Claude
Mu murenge wa Musanze, mu Kagari ka Cyabagarura hari umusore witwa Eric wari usanzwe ari ’mucoma’ yansanzwe yapfuye akaswe ijosi, bikekwa ko byakozwe n’umushumba.
Ibi byabaye mu rukerera rwo kuri iki Cyumweru tariki ya 16 Mata 2023, mu kagari ka Cyabagarura mu mudugudu wa Gaturo, aho uyu musore basanze yaguye.
Umunyamakuru wa mamaurwagasbo yifuje kumenya icyo abaturage bavuga kuri uru rupfu maze bose bahuriza ku mushumba bikekwa ko yakoze urwo rugomo.
Ukekwa kuri ubu uri mu bitaro kugira ngo avurwe ibikonere byatewe no kurwana uwo mushumba ashaka kumwambura ibyo yari afite undi akamurusha ubusore ariko kuko yari yitwaje umuhoro bikarangira amutemye mu mutwe undi akahasiga ubuzima.
Umuturage witwa Ntirenganya yagize ati: "Abantu bazindutse bajya gushakisha ahava amafaranga bageze hano basanga umuntu uryamye ariko hari amaraso menshi,bamwegereye basanga yatemwe mu mutwe yumye kera ndetse banawuciye bahita bahuruza abantu n’inzego z’umutekano uko niko twamenye urupfu rw’uyu nyakwigendera.
Abandi baturage bavuga ko uyu musore wishwe batari bamuzi neza ariko ngo yari atuye aho hafi, bifuje ko inzego z’umutekano zigira icyo zikora, baratunga agatoki umushumba uvuks i Nyabihu, usanzwe aragira muri aka gace wijyanye ku bitaro mu ijoro ko ariwe ushobora kuba yakoze aya mahano.
Ntuyehe yagize ati:"Wakwibaza uko uyu mushumba yagiye ku bitaro iryo joro nubwo nawe arembye ariko niwe dukeka ko yamutangiriye kuko urugomo rw’abashumba b’inaha n’ubwo rutaherukaga turaruzi ndetse n’ubwambuzi bw’amatelefone bwadutse muri aka karere akenshi nibo baba babirinyuma."
Umunyamabanga nshingwabikorwa w’Akagari ka Cyabagarura Niyoyita Ally aya makuru y’ubu bwicanyi babumenye ariko ngo inzego zibishinzwe zikomeje gukora iperereza kugira ngo bamenye icyishe uyu musore.
Ati": Nibyo Koko iki kibazo twakimenye mu gitondo cy’uyu munsi ku cyumweru tariki ya 16 Mata 2023 , kandi inzego z’umutekano zahise zihagera zitwara umurambo wa nyakwigendera kugira ngo upimwe hasuzumwe ukoyishwe natwe turacyategereje ayo makuru, uwishwe yari acumbitse muri aka Kagari, kuko akomoka mu karere ka Rutsiro."
Yakomeje agaira ati" uyu Eric yari mucoma ahitwa younde ariko ubusanzwe inaha hejuru ya saa sita abenshi baba baryamye ibi nabyo dukwiye kubirebaho tukamenya impamvu yatashye bwije akarusho mu nzira nk’iyi itarimo amatara ikindi Kandi hari amakuru avuga ko we n’uriya mushumba bari basanzwe baziranye."
Gitifu Niyoyita Ally avuga ko bihutiye guhumuriza abaturage bitewe n’ubwoba bari bagize ndetse yijeje abaturage ko inzego z’umutekano ziri maso mu kurinda abatirarwanda.
Hirya no hino muri aka karere hakomeje kuvugwa urugomo rw’insoresore zikomeje gutega abantu zikabambura utwabo, mu gihe ubwo ari bwose mu baturage cyane ko basigaye bataha hakiri kare kubera gutinya urugomo ruzwo nko guterwa (kaci).
Umuvugizi wa Polisi y’u Rwanda CP John Bosco Kabera mu kiganiro aherutse kugirana n’abanyamakuru yavuze ko batazigera bihanganira abajuru ndetse asaba abaturage kujya batanga amakuru hakiri kare kuri iki kibazo cy’ubujura kugira ngo bafatwe.
