Ndayambaje Jean Calude
Minisiteri y’Umuco na Siporo mu Rwanda yandikiye Federasiyo y’umupira w’Amaguru u Rwanda ibamenyesha ko ikipe y’igihugu y’abagore itakitabiriye irushanwa Nyafurika ryo gushaka itike y’igikombe cy’Afurika kizabera muri Maroc umwaka utaha wa 2022.
Mu kiganiro yagiranye na Radio Rwanda Jules Karangwa, umunyamategeko muri Federasiyo y’umupira w’Amaguru mu Rwanda akaba no muri komisiyo ishinzwe gutegura amarushanwa, yasobanuye uburyo bakiriye iyi baruwa n’icyo bagiye gukora.
Yagize ati "Uburyo twayakiriyemo butandukanye nubwo twifuzaga kandi hari inama batugiriye, mu birebana no gutegura irushanwa ry’ikiciro cy’abari n’abategarugori n’inshingano nyamukuru za Federasiyo mu gihe imbogamizi za covid-19 zabayemo mu myaka ibiri ishyize."
Akomeza avuga ko mu birebana no gutegura gahunda yiterambere ry’igihe kirambye ry’umupira w’Amaguru by’umwihariko mu bagore bizategurwa umwaka utaha cyane ko biri mu migabo n’imigambi y’ubuyobozi bushya.
Agira ati"Ntekereza ko nubundi mu by’ukuri inama twagiriwe na minisiteri zirahura n’ubundi na gahunda zisanzwe zari zihari zatangiye gukorwa, ku bijyanye no kutitabira birumvikana kuva ku mukinnyi kugeza kuri twe dutegura ikipe ntawakubwira ko twishimye kuba tutazitabira."
Nyinawumuntu Grace, Umutoza w’ikipe y’igihugu y’abagore y’abatarengeje imyaka 20 ikubutse muri Ethiopia avuga ko hashyirwamo imbaraga nyinshi kugira ngo abakobwa b’u Rwanda bave ku rwego rumwe banjye ku rundi ariko nanone abona ko Covid-19 yabaye imbogamizi.
Ati "Ku byerekeranye no kuba iriya kipe yahagaritswe ntabwo twebwe byadushimishije, yewe n’abakinnyi, nubwo muri Sfaff yari kuzayitoza nkeka ko ntarindimo kuko nta muntu wari warigeze amenyesha, ariko nanone navuga ko kuba ihagaritswe byaba bishobora kuba bigiye kuba byiza mu nzira zo gutegura umupira w’Amaguru w’abagore bakava ku rwego rumwe bakajya ku rundi rwego."
Uyu mutoza akomeza avuga kudategurwa neza ari cyo kintu cyabagoye ubwo bakinaga na Ethiopia y’abatarengeje imyaka 20 ndetse banyagiwe ibitego byinshi.
Ati" Aya ni amahirwe dutakaje, njye mbona ko agoye ko yazongera kuboneka, kuko ni inzira twari tugiye gucamo; yari inzira yoroshye kuko twagombaga kuzahura na Djibouti urwego rwabo ruri hasi ugereranyije n’urwego rw’abanyarwandakazi, Abarundi, Eritheria. Iri n’isomo, tubonye ingamba, ubu zigomba kuba zimwe zo gutegura ikipe y’igihugu hakiri kare."
Benshi bafite aho bahurira n’umupira w’amaguru mu Rwanda baragira inama Federasiyo y’umupira yo gushyira ingufu muri Shampiyona y’abari n’abategarugori kugira ngo abakinnyi bajye bahora biteguye kuba bahatana n’andi makipe kuruta uko bajya bahamagarwa hasigaye icyumweru kimwe.
