Abahinzi b’ibibigori bo mu murenge wa Rugera mu karere ka Nyabihu bafite ubwoba bw’igihombo bashobora guhura nacyo nyuma yo gukorerwaho ubutubuzi na koperative KOTEMI.
Iyi koperative KOTEMI ngo yaje muri imwe mu murima y’ibigori byabo ikora icyo bita ’gakona’ ibigori byabo (kubikuraho umutwe wo hejuru uriho ingangangabo) ibizeza ko bazabona umusaruro mwiza none ngo bari kujya gutonora ikigori bagasanga ntampeke ziriho.
Aba baturage babitangarije umunyamakuru wa mamaurwagasabo ubwo yageraga ahahinze ibi bigori, basaba ko bazahabwa ubufasha bwo kubashumbusha bagasubizwa ibyo batakaje batera ibyo bigori kugira ngo inzara itazabica mu minsi iri imbere.
Umwe muri aba bahinzi witwa Barebereho Victoire yagize ati: "Twebwe Twahinze ibigori ku giti cyacu , ibigori turabikorera bigeze igihe cyo guterera koperative iraza ibica imitwe, none ibigori byararumbye, ubu abana bacu bagiye kureka amashuri bitewe nuko nta musaruro tuzabona, baje barimo kutubwira ngo bazaturangira isoko ryo kugurishirizaho ibi bigori ku kilo ibihumbi 3000, ariko batugurisha imbuto y’ikigabo ibihumbi 4000, n’ibihumbi 5000 ku kigore."
Undi muturage witwa Mukamana Margaret yagize ati: "Ubundi hano ni isambu ya mbere yanjye, baraje babica imitwe ariko byarahetse watonora ugasanga ikigori ari igihuhwe kiri aho, inzara izatwica mu minsi iri imbere. Turasaba ko batwunganira kuko abaduteje igihombo barahari; nasaruraga byibuze imifuka ine ariko ubu ntacyizere mfite, kugeza ubu murabona ko byamaze gupfa burundu."
Murenzi Francois nawe ni umuhinzi byabayeho, yagize ati: "Twarahinze ariko abantu batuzanira imbuto, baraza bimaze guterera bavuna utu tuyange two hejuru, bya bigori bihita biba amataraganya, ariko iyo tubajije uwo muyobozi aratubwira ngo nanjye niyo mabwiriza bampaye, urimo gusanga ari impede itatu, ibiri, baraje barabikona bitarabangurirana ubu dufite ikibazo gikomeye, nubwo bavuga ngo dutegereze bizabanze bisarurwe ariko nta musaruro twiteze ntawe rwose."
Bakomeza bavuga ko batangiye kubona ko bazahura n’igihombo ngo bitewe nuko barimo gutonora ikigori bagasanga nta mpeke, barasaba abagize iyi koperative kuzabasubiza ibyo batakaje.
Umuyobozi wa koperative KOTEMI ikorera mu murenge wa Rugera, Hakizimana Jean Claude yahumurije aba baturage ko bakwihangana bagategereza bikabanza gusarurwa ngo kuko ibi bigori byose biri mu bishingizi bijyanye n’amasezerano bafitanye na ’Tree seed company’.
Yagize ati: "Ni ukuvuga ngo biriya bigori biri mu butubuzi, ni hegitari 10, ubutubuzi uko bukorwa batera ibigabo bagatera n’ibigore, iyo mbuto yatanzwe na Company yitwa Tree seed iyiha abahinzi ndetse irangije yatanze amasezerano ko izabagurira umusaruro, icyo bari kwita igihombo twebwe ntiturakibara nk’igihombo kuko ntiturasarura kuko iyo Company izagura ku mahundo niko amasezerano ameze, kandi ibyo bigori bihingwa haje goronome wa wayo aba ku mirima, ikindi bifite ubwishingizi, igihombo rero ntaho mbona aho cyava ngo kigere ku muturage nka njye."
Hakizimana yakomeje agira ati: " Mu masezerano dufite bagomba kuzagura ihundo bahere ku ryabumbye ku kigero cya 70% , iyo company itatuguriye wenda ayo yo si amakuru, kandi batubwiye ko ibyo bigori bikiri mu maboko ya Tree seed bazatugurira ni bahunure rwose, biramutse bidakozwe gutyo natwe ubwacu twabarega".
Musango Didace Uhagarariye ubuhinzi n’ubworozi mu karere ka Nyabihu, yavuze ko iki kibazo bakimenye ndetse ngo bari babatumijeho kugira ngo bamenye impamvu.
Yagize ati: "Ayo makuru natwe twarayamenye, kuko n’ibigori byatewe mu buryo bw’ubushakashatsi hari company yitwa Tree seed yabahaye imbuto, icyo turimo gukora twabatumijeho kugira ngo turebe impamvu, mu cyumweru gitaha nibwo tuzabijyamo, ikiriho biba byaranashyizwe mu bishingizi ubwo nyuma yo kuganira nibwo tuzamenya icyo tuzafasha abahinzi."
Ibigori byahuye n’icyo kibazo ni ibigori bihinze kuri hegitari zigera mu icumi gusa, nubwo mu mvugo y’aba bahinzi bumvikanisha ko batigeze basibanurirwa igishobora kuzaba ku bigori byabo biri mu butubuzi ariko baravuga ko baramutse batagize icyo bafashwa bazahura n’inzara ikomeye kuko ngo mbere bahingaga muri iyi mirima bakeza ndetse ngo bakabona umusaruro ushimishije ariko ubu ntacyo bizeye.
Ibigori bitakoreweho ubushakashatsi nta kibazo cyo kubura intete byagize
Yanditswe na Jean Claude Ndayambaje
