Umugiraneza Alice
Mu karere ka Nyabihu mu murenge wa Mukamira, mu kagari ka Jaba hari abaturage batabariza abana bafite imibereho bita mibi yo kwirirwa batariye, umwanda n’ibindi bakavuga ko ababyeyi babo mu bigaragara batishoboye ku buryo abana bamwe bataye ishuri kubera kubura ibikoresho by’ishuri n’imyambaro.
Umunyamakuru wa Mamaurwagasabo yasuye uyu muryango uherereye mu mudugudu wa Nyirabashenyi aganira n’abaturanyi b’uwo muryango ndetse aganira n’umwana mukuru muri abo bana baba basigaye ku rugo mu gihe ababyi babo bagiye guca inshuro.
Umukuru muri bo afite imyaka 13 y’amavuko kandi ntiyigeze yiga kubera ubushobozi buke bwo kubura ibikoresho.
Bamwe mu baturanyi buyu muryango bavuga ko igihe ababyeyi b’abo bana bagiye guca inshuro bataha bwije kandi nta cyo kurya basigiye abana kibahagije bakirirwa mu ngo z’abaturanyi bicira isazi mu jisho.
Uwitwa Ruth ni umwe mu baturanyi b’uyu muryango, yagize ati "Mu by’ukuri aba bana babayeho nabi pe, njyewe ndi umuturanyi wabo ariko ubuzima bwabo ntabwo. Urabona ko izi saha turi saa munane ariko ndahamya ko nta kintu barashyira ku munwa.
Niba hari icyakorwa kugira ngo harengerwe uyu muryango cyakorwa hakiri kare kuko iyo umwana ageze aho kuburara akabwirirwa biba byafashe indi ntera.”
Akomeza avugako uyu muryango nabo ari umuzigo kuri bo, ati “Ntiwateka ngo warure urye uryame uzi ko abana nk’aba bari hano ngo w’umveko utekanye.”
Abandi baturanyi bavuga ko umubyeyo w’abo bana w’umugore ari we babona afite imbaraga n’ubushake bwo gukora kuruta Papa wabo bityo Leta yagakwiye kugira icyo yamufasha akavana abana mu buzima bubi barimo.
Mukantwali Anita nawe avuga ko hari uburenganzira bw’abana butubahirizwa cyane nk’ubwo kwiga.
Akomeza aragira ati "Nkubu mwana w’imyaka 13 utarigeze akandagira mu ishuri urumva ko ari ikibazo kandi umwana ni umutware, ntiwamenya icyo azaba cyo ejo hazaza."
Uyu mwana mukuru muri bo yabwiye umunyamakuru ko mu gahinda kenshi avuga ko Leta nabo yagira icyo ibamarira.
Ati "Njyewe mbonye ubufasha bw’imyenda, amakaye, amakaramu, ndetse nibyo kurya nahita njya ku ishuri. Kuko mama ntabwo yabona amafaranga yo kuduhahira, nabyo biba bimugoye cyane ko hari n’igihe bibura tukabwirirwa tukanaburara, urumva ko ibyo byose atabishobora."
Murumuna we yagize ati "Nimbona amakaye, amakaramu ndetse n’imyenda nzajya kwiga."
Ubuyobozi bw’akarere ka Nyabihu bwo buvuga ko iki kibazo bugiye kugishakira umuti.
Simpenzwe Pascal, ni umukozi ushinzwe imibereho myiza mu karere ka Nyabihu, yagize ati "Vuba cyane tugiye gukurikirana neza uyu muryango turebe uko twabafaha tubashakira n’icyo gukora kuko tujya tugira imirimo muri VUP, mu gihe baba babishoboye kandi batabishoboye gukora twareba ukundi babaho. Naho abo bana tubashakire ibikoresho by’ishuri basubire ku ishuri."
Kugeza ubwo twakoraga iyi nkuru ababyeyi baba bana bari batarakaboneka, kuko baba bagiye gushaka imibereho. Uyu muryango ugizwe n’abana 7, umukuru muri bo afite imyaka 13.
