Ishami ry’Umuryangi w’Abibumbye ryita ku Buzima, OMS, ryemeje imiti ibiri, ari yo Baricitinib ifatanywa na Corticosteroids, ko yakifashishwa mu kuvura abarembejwe na COVID-19.
Iyi Baricitinib yari isanzwe ikoreshwa mu kuvura za rubagumpande zikunze gufata abageze mu za bukuru, mu gihe izi Corticosteroids ari imisemburo ikorwa mu nganda ubundi ikorwa n’imvubura ebyiri ziba hejuru y’impyiko, izwiho kugabanya ububyimbe n’uburibwe.
Uwo muti uvanze ugabanya ubukana bwo guhumeka nabi kandi nta kimenyetso barabona kigaragaza ingaruka mbi zawo ku barwaye covid-19 bawukoresheje.
Itsinda mpuzamahanga ry’Impuguke za OMS zabitangaje kuri uyu wa Gatanu binyuze mu kinyamakuru kivuga ku Buzima cy’Abongereza British Medical Journal.
Hari undi muti witwa Sotrovimab nawo OMS ivuga ko wakifashishwa ku bafite COVID-19 idakanganye cyane ariko bafite ibyago byinshi byo kuba isaha ku isaha bajya mu bitaro.
Ibi bitangajwe mu gihe isi iri guhangana n’ubwiyongere bukabije bwa virusi ya Corona yihinduranyije izwi nka Omicron, izwiho kwandura ku muvuduko uhambaye ariko bamwe bakavuga ko itarembya cyangwa ngo yice nk’iyayibanjirije ya Delta.
Yanditswe na Mutungirehe Samuel
