Perezida Doumbouya yasheshe Guverinoma

Perezida wa Guinea Conakry, Col Mamady Doumbouya yasheshe Guverinoma, ni ukuvuga abaminisitiri, avuga ko baza gushyiraho indi nshya.

Byatangajwe na Perezidansi y’iki gihugu.

Umunyamabanga Mukuru muri Perezidansi ya Guinea Conakry, Amara Camara, ejo kuwa Mbere yatangaje mu buryo butunguranye ko Guverinoma yasheshwe, ariko ntiyavuga impamvu y’iryo seswa.

Mu mashusho yanyujijwe ku mbuga nkoranyambaga za Perezidanse ya Guinea, Amara yavuze ko abayobozi barimo abanyamabanga bakuru ba Leta n’abungirije, aribo bazakomeza imirimo yakorwaga n’Abamisitiri kugeza igihe hazagiraho indi Guverinoma nshya.

Guinea Conakry imaze igihe kiyobowe n’abasirikare bahiritse ubutegetsi bwari buriho, kuva mu kwezi kwa Nzeri mu mwaka wa 2021.

Umuryango w’Ubukungu wo mu Karere ka Afurika y’Iburengerazuba (CEDEAO), umaze igihe wotsa igitutu ubutegesti bw’igisirikare usaba ko butegura amatora bidatinze, bugasubizaho ubutegetsi bw’abasivili.

Tariki 22 Ukwakira 2022, impande zombi zemeranyijwe ko inzibacyuho izamara amezi 24 gusa.