Yanditswe na Mutungirehe Samuel
Ababyeyi bakora ubucuruzi bwambukiranya umupaka muto wa Rubavu, uzwi nka Petite Barriere, uhuza u Rwanda na Repubulika Iharanira Demokarasi ya Kongo ku gice cya Goma, baribaza impamvu iyo batashye batemererwa kwinjirana icyo baza kugaburira abana babo, bakavuga ko utahanye akantu kose ko kurya ku mupaka w’u Rwanda bakamwambura kandi batari bubone uko baca mu masoko ya Rubavu kuko buba bwije bigatuma bashobora kuburara.
Bamwe mu baganiriye na Mamaurwagasabo, bavuze ko umwanya wabo wose bawumara bakora ubucuruzi bwambukiranya umupaka bajya, banava muri Kongo, ariko ntibemererwa kugira icyo kurya binjiza mu Rwanda, bakabwirwa ko icyo bemerewe kujya kuzana i Goma ari amafaranga gusa ibindi basabwa kubihaha mu Rwanda.
Umwe muri bo yagize ati "Ikibazo dufite ni iki, ntiwishyuye Laissez-Passer yawe, si ubuhahirane turimo, ariko urazana ibakure y’umuceri bakayikwaka, waba uguze Salsa ebyiri zo guteka bakazikwaka.
Reba nk’ubungubu njyanye amashaza muri Congo, ubu ntabwo nahaha Salsa ebyiri, ndagera hano bazinyake, n’imwe barayikwaka; nta nakimwe cyemewe hano mu gihugu, baba basaba ngo tugende tuzane amafaranga gusa. Ntiwavuga ngo usize utetse isombe ngo nutaha urazana amamesa ya 500Frw ngo ushyiremo abana bararire."
Mugenzi we asobanura impamvu byaba byiza guhahira ku ruhande rwa Congo igihe batashye.
Yagize ati "Nonese niba wagiye gucururiza ahantu bukakwiriraho; noneho dufiteyo n’abavandimwe ukababwira uti uyu munsi ndi kubona ntacuruje ngo bigende mpimira nka mironko y’umuceri, umpe na Salsa ebyiri n’amavuta njye guteka burije abana bataburara.
Ukaza ariko wagera hano ku mupaka bakabikwaka."
Iyo ubabajije icyo inzego z’abinjira n’abasohoka zibabwira mu gihe zibambura ibyo kurya batahanye, aba babyeyi bakubwira ko nabo batarasobanukirwa inyito bihabwa cyangwa ngo bamenye n’aho bijya.
Bato "Ibaze niba babimena aho bita mu Kiyarara ibintI niriwe mpaha ngo bana baze kurya."
Ikibabaza aba babyeyi ni uko abakongomani bakora bucuruzi nk’ubwabo bo bemererwa kugira cyo batahana ariko bo ntibererwe kugira icyo batahana kandi guhahira i Goma bihendutse inshuro hafi ebyiri ku giciro cyo i Rwanda.
Umuyobozi w’akarere ka Rubavu, Kambogo Ildephonse yasobanuye ko bimbwe babibuzwa mu rwego rwo kwirinda ko byazamo magendu.
Yagize ati "Hari ibintu byemewe byo gucyura mu rugo, ariko uwo tureba ni wawundi wazanye ibintu ariko ugasanga bimwe yabihaye bagenzi be wajya kubona ukabona ni ibyo gucuruza ariko mu byukuri ibyo gucuruza biraza kandi hari ibipimo bihari. Urutonde rw’ibyemewe rurahari n’ibipimo; icyo uzanye mu ntiko wifashisha, amavuta, amata n’ibindi byose biba byemewe ariko ntabwo twemera bya bindi wagiye utandukanya, ugaragaza kinwe hariya ahandi bitatu, bitanu, ukabikora kugira ngo ujijishe."
Uyu muyobozi akomeza asaba abo bagore bakora mu bucuruzi bwambukiranya umupaka muto wa Rubavu kugira uruhande bahereramo; abashaka gucuruza bakabigaragaza n’abakeneye ibyo kurya bikamenyekana bakubahiriza ibipimo byashyizweho.
