Mu mudugudu wa Rubumba ho mu kagari ka Nyange mu Murenge wa Bugarama mu karere ka Rusizi hatoraguwe umurambo wa Hakizimana Obed wajyaga avugwaho ubujura, ndetse yigeze kuvugwaho kwambura telephone Gitifu w’uwo murenge.
Ni amakuru yamenyekanye kuri uyu wambere tariki ya 12 kanama 2024 mu murenge wa bugarama w’akarere ka Rusizi, aho umurambo w’uwitwa Hakizimana Obed warusanzwe uzwi ku izina rya HAKIZA wataraguwe mu mududu wa Rubumba hafi y’umuhanda ahitaruye ingo.
Bamwe mu baturage babonye uyu murambo bavuze ko uyu Hakiza yari asanzwe azwi nk’umwe mubazengereje abaturage muri uyu murenge wa Bugarama. Bavuga ko hari amakuru bigeze kumva ko yigeze gushikuza telephone umunyabanganshingwabikorwa w’uyu murenge
Yagize ati: ”Uyu Hakiza yari asanzwe ari igisambo ruharwa, ni wawundi bavuze wigeze gushikuza gitifu telephone’’.
Ubwo abandi babona umurambo bagakangarana, bavuze ko yari asanzwe atuye mu mudugu wa Mubombo akagari ka Ryankana, mu buryo butunguranye bavuzaga impundu.
Umwe mubari aha yabwiye ikinyamakuru Mamaurwagasabo ko uyu mugabo uretse no kwambura abantu no gutobora inzu ngo hari n’abo yavutsaga ubuzima.
Yagize ati: "Uyu yari afite amatsinda atandatu, rimwe ryabaga mu makaro, irindi rikaba mu Kabamba, irindi rikaba aha nyine umurambo we bawusanze, ariko akagira n’irindi ryajyaga gutobora inzu. We yari umuyobozi wabo bose. Bibaga inka, ihene, telephone ngendanwa; banagendanaga inkota, niyo mpamvu rero ubona abantu bose hano basa n’abatababajwe n’urupfu rwe ahubwo barwishimiye’’.
Ibyurupfu rwa Hakizimana Obed byemejwe n’umunyamabanga nganshingabikorwa w’umurenge wa Bugarama Bwana Nsengiyumva Vicent de Paul, wanavuze ko yari asanzwe azwiho imyitwarire idahwitse muri rubanda.
Yagize ati’: "Yego nibyo urupfu rwe twarumenye. Icyaba cyamwishe ntacyo twakeka ariko RIB yatangiye iperereza, niyo yazamenya icyamwishe. Yari asanzwe yitwara nabi, akenshi yakunze gufatirwa mu bikorwa by’ubujura ndetse n’ibyimyitwarire mibi akajyanwa kugororwa ndetse yigeze no gufatirwa mu cyuho arafatwa ajyanwa mu rukiko arafungwa igihano yakatiwe arakirangiza. Ibyo rero abaturage bavuga niko bimeze, imyitarireye yari mibi gusa ntabwo byahuzwa no kuba yapfuye reka dutegereze iperereza niryo ryazatangaza byinshi kuri uru rupfu."
Aha basanze uyu murambo si ubwambere hatoraguwe uwapfuye.
Umunyabanga Nshingwabikorwa yagiriye Inama abaturage yo kujya bitwararika cyane mugihe abantu bagize icyo bapfa, bakaba bakihutira kubimenyesha inzego zibegereye.
Nsengiyumva yagize ati: "Ni ukwitwara neza, haba haramutse ugirana ikibazo n’umuntu yaba uwibwe cyangwa uwahemukiwe, ni ukubishyikiriza inzego zibegere cyangwa bakabishyikiriza inzego z’umutekano nka RIB na Police bakabikurikirana hakiri kare, ntabwo umuturage akwiriye kwihanira uretse ko tutanabihuza no kuba uyu yishwe ngo wenda tuvuge ko haba hari uwihaniye, nacyane ko nta perereza rirakorwa ngo tubyemeze."
Abaturage bakeka ko uyu Hakizimana Obed ashobora kuba yiciwe ahandi akaza kujugunywa aha kuko nta bimenyetso bigaragara byuko yaba yiciwe aho.
Ikindi aho atuye naho bamusanze harimo intera nini, cyane ko atuye mu kagari ka Ryankana umurambo we ukaba wasanzwe mu kagari ka Nyange.
Aha muri uyu murenge wa Bugarama hakunze kuvugwa ibikorwa by’ubujura bwiganjemo gushikuza abantu amatelefone cyangwa kubambura ibyo bitwaje hakaniyongera kwiba imyaka mu mirima no gutobora amazu.
