Umusirikare w’u Rwanda yagaragaye mu biganiro byahuje Umutwe w’Inyeshyamba wa M23 n’ingabo za Repubulika ya Demukarasi ya Congo, FARDC.
Ni umusirikate ubarizwa mu mutwe w’ingabo z’umuryango wa Afurika y’iburasirazuba uzwi nka EACRF.
Yagaragaye mu mpuzankano ya RDF iriho ikirango cya EACRF yari yaherekeje Komanda w’uyu mutwe, Lieutenant General Jeff Nyagah muri ibi biganiro byabereye mu gace ka Kibumba gahana imbibi.
Abandi bari muri ibi biganiro barimo Colonel Nzenze Imani uyobora ibirindiro bya M23 biri muri Kibumba, Lieutenant General Tchiko Tshitambwe uyobora ibikorwa bya FARDC muri rusange na General Mashita uyobora ibikorwa bya FARDC mu ntara ya Kivu y’Amajyaruguru.
Mu mutekano usesuye wari urinzwe n’ingabo za Kenya zibarizwa muri EACRF, intumwa za M23 na FARDC zaganiriye ku imirwano yahagarara, uyu mutwe witwaje intwaro ugasubira mu birindiro wahozemo, hagakurikiraho ibiganiro bya politiki.
Uyu musirikare w’u Rwanda ari muri EACRF hashingiwe ku mwanzuro wafashwe n’abakuru b’ibihugu bya EAC, ushyirwa mu bikorwa n’abagaba bakuru b’ingabo.
Uyu mwanzuro wavugaga ko buri gihugu kiri muri EAC kigomba kohereza muri EACRF umusirikare uzungiriza komanda mukuru, Gen. Nyagah, mu buyobozi bw’ubutumwa bw’amahoro.
