Yanditswe na Ndayambaje Jean Claude
Bitewe n’umusaruro muke umutoza Masudi Djuma yahagaritswe gutoza Rayon sports nyuma yo gutsindwa na Kiyovu Sports ibitego 2-0 mu mukino uheruka w’umunsi wa 7 wa shampiyona.
Nkuko byatangajwe n’ubuyobozi bwa Rayon sports mu itangazo ryashyizwe hanze kuri uyu wa Kabiri, tariki ya 7 Ukuboza 2021 rivuga ko Masudi yahagaritswe by’agateganyo n’ubuyobozi bw’ikipe kubera umusaruro muke, bishobora no kurangira atandukanye burundu n’iyi Kipe kuko yahise itangira ibiganiro n’undi mutoza mu buryo bw’ibanga.
Itangazo rya Rayon sports rigira riti "Umutoza wungirije, Lomami Marcel, ni we usigarana inshingano zo gutoza ikipe by’agateganyo."
Uyu mutoza ukomoka mu gihugu cy’u Burundi, asize Rayon Sports ifite amanota 11 mu mikino 7 yari amaze gukina muri Shampiyona y’u Rwanda, iri ku mwanya wa Gatanu ku rutonde rw’agateganyo.
Mu nama yahuje ubuyobozi bwa Rayon Sports n’abahagarariye abakinnyi barimo Muhire Kevin akaba Kapiteni, iyi nama yafatiwemo umwanzuro ko Masudi Djuma yirukanwa bijyanye n’imibanire itari myiza hagati ye n’abakinnyi nkuko bivugwa .
Rayon sports yatsinzwe na APR fc ibitego 2-1, irongera itsindwa na kiyovu sports ibitego 2-0, Rayon Sports yatsinze Etoile de l’Est igitego 1-0 mu gihe yatakaje amanota i Rusizi ubwo yanganyaga na Espoir FC ibitego 2-2 bigoranye .
Imikino iyi kipe yatsinze ni umukino ufungura shampiyona yatsinzemo Mukura Victory Sports igitego 1-0, inganya na Rutsiro FC ibitego 2-2 mu gihe yatsinze Bugesera FC ibitego 3-1 umusaruro unengwa n’abakunzi ba Rayon sports bavuga ko itakabye ifite aya manota 11/21.
Ku wa Gatandatu, tariki ya 11 Ukuboza, nibwo Rayon sports izakira Gorilla FC mu mukino w’umunsi wa 8wa Shampiyona, umukino utegerejwe n’abantu benshi.
Ibyo wamenya Ku mutoza Masudi Djuma mu ikipe ya Rayon sports
Uyu mutoza yagizwe Umutoza wa Rayon Sports ayigarutsemo ku nshuro ya 2 muri Nyakanga uyu mwaka wa 2021, ni nyuma y’uko yari yarabaye muri iyi kipe mu myaka ishyize ya 2016 na 2017, ayifasha kwegukana Igikombe cy’Amahoro n’icya Shampiyona aho benshi bamutaziye akazina ka (Commando) asingizwa ko afite ubuhanga bwo gutoza.
Masudi Djuma w’imyaka 44 y’amavuko yakunze kugaragaza ko Rayon sports iri ku rwego rwo hasi muri uyu mwaka, yageze mu Rwanda bwa mbere mu 1998, akinira APR FC imyaka ibiri mbere yo kwerekeza muri Kiyovu Sports abica bigacika.
Mu mwaka 2003 ni bwo yerekeje muri Rayon Sports maze mu 2004 ayifasha gutwara Shampiyona ubwo yatozwaga na Kayiranga Baptiste, nyuma ava muri iyi kipe yerekeza muri Seychelles mbere yo kugaruka mu bururu n’umweru mu 2006 agakina umwaka umwe, akaba yarahagaritse Ruhago muri 2010.
Uyu mutoza yatoje amakipe arimo Bukavu Dawa, Simba SC yo muri Tanzania, As Kigali yo mu Rwanda, yatoje na Bugesera fc.
