Perereza wa Repubulika y’u Rwanda Kagame Paul yatangaje ko urukingo ruzakorerwa mu Rwanda ruzabanza kuramira Abanyarwanda hanyuma rufashe n’abandi banyafurika batuye kuri uwo mugabane.
Yabitangaje kuri uyu wa Gatanu ubwo yari amaze kwakira indahiro z’abayobozi bashya baherutse gushyirwaho muri iki cyumweru.
Umuhango wo kwakira indahiro wabereye mu Ngoro y’inteko ishinga amategeko, Kimihurura.
Perereza Kagame yashimiye Abanyarwanda uko bakomeje kwitabira guhabwa urukingo rwa COVID 19 anizeza ko n’izigiye kujya zikorerwa imbere mu gihugu ari bo zizabanza kugira akamaro.
Yagize ati, "Wenda murabikurikirana hirya no hino, urukingo ruzakorerwa hano ruzabanza ruramire Abanyarwanda hanyuma rukomeze ruramira n’abandi Banyafurika ndetse n’ahandi wenda niruba ruhagije, ni byo twifuza."
Umukuru w’igihugu yavuze ko intego yo kubaka uruganda rukora imiti n’inkingo zirimo iza Covid 19 itari iyo gusa ahubwo ruzanagera ku bushobozi bwo gukora urukingo rwa Malaria narwo ruherutse kwemezwa vuba aha.
Ati "Abo bazaba bakora harimo Abanyarwanda benshi bakoranye n’abazaba badufashije kurubona no kurukora, hari n’ibindi bakora ndetse urukingo rushobora kkuba rukingira indwara tuzi twese ya Malaria."
Mu kwezi gushize k’Ukwakira ni bwo ishami ry’Umuryango w’Abibumbye ryita ku Buzima OMS ryemeje urukingo rwa Malaria rukazakora cyane mu bihugu byiganjemo iki cyorezo cyane nk’ibyo ku mugabane w’Afurika munsi y’Ubutayu bwa Sahara.
Abayobozi bashya barahiriye inshingano bahawe ni Assumpta Ingabire wagizwe Umunyamabanga wa Leta muri Minisiteri y’Ubutegetsi bw’igihugu ushinzwe imibereho y’abaturage, Alexis Kamuhire, Umugenzuzi Mukuru wa Leta.
DCGP Rose Muhisoni, wagizwe Umuyobozi Mukuru wungirije w’Urwego rw’Imfungwa n’Amagereza
