Ababyeyi barerera mu ishuri mpuzamahanga rya Wisdom Schools barashima urwego abana babo bagezeho mu kubaka imashini zikoresha zizwi nka "robo", bakoresheje ubuhanga (building robots/ Maths and robotics)
Babitangaje kuri uyu wa Gatanu tariki ya 17 Gicurasi 2024 ubwo abana bamurikiraga ababyeyi babo urwego bamaze kugera muri iyi porogaramu nshya iri shuri ryatangije ndetse ngo biteze umusaruro ufatika bitewe n’umuhate babona abana bafite mu gukoresha izo robo.
Ku ruhande rw’abana baganiriye na Mamaurwagasabo, basanga Isi uburyo irimo kwiruka ngo nabo bakwiye kujyana nayo mu ikoranabuhanga rishingiye ku bumenyi.
Ishimwe Patience yiga mu mwaka wa gatanu muri MCB yagize ati: "Batweretse uburyo robo mu minsi iri mbere zizaba zikora akazi gasanzwe gakorwa n’abantu, aho robo izajya iterura ikintu kimwe ikivane hamwe igishyire hariya, robo ishobora kuvangura imyenda ikurikije ibara, mu by’ukuri Isi yacu irimo kwihuta mu ikoranabuhanga, natwe dukwiye kujyana nayo, kandi ndashimira Wisdom Schools ikomeje kutwigisha gukoresha ama robo n’ababyeyi bacu bakomeze badushyigikire muri iyi porogaramu."
Undi munyeshuri witwa Ineza Tuyishime Kevin, yiga muri S6 PCB, yagize ati: "Turi mu isi iri gutera imbere, turi mu isi iri mu majyambere bityo dukeneye ibintu bizadufasha kubona amafaranga tuzajya dukoresha, mwabonye ko izi robo turimo kwiga guhanga uyu munsi zizajya zidufasha kwihutisha akazi, bisaba ubuhanga kubaka robo, ariko kubera ko dufite abarimu b’inzobere babitwigisha bizadufasha natwe kubimenya neza bityo nitugera hanze natwe tuzajye tubyigisha abandi tubone amafaranga."
Nizeyemariya Nathali, ni umwe mu babyeyi barerera muri Wisdom Schools, yagize ati: "Njye natunguwe no kubona uburyo umwana ashobora kubaka robo, byanshimishije cyane, ibaze umwana ufite buriya bumenyi akiri muri primary, azagera hejuru afite ubumenyi bwisumbuye muri Maths and robotics, kandi mu myaka itanu iri imbere umwana utazi iri koranabuhanga azaba yarasigaye, urwego bagezeho rurashimishije. Nabonye uburyo bashyiraga ŕobo muri sisiteme igakora akazi kubera Isi iri mu muvuduko w’iterambere n’ikoranabuhanga ntidukwiye gusigara inyuma."
Ntirenganya Valens ni umuyobozi wa porogaramu ijyanye no kwigisha robotics muri Wisdom school, yagize ati: "Nkuko mubona uburyo Isi ihora ihinduka kandi ijya mu ikoranabuhanga cyane, ni byiza ko n’abana bacu tubashyira mu ikoranabuhanga kurushaho. Iyi porogaramu isaba gutekereza kandi bakoresha uburyo buri ’virtual’, bw’ukuri, murabizi ko iyo umuntu agiye kubaka inzu abanza gukora igishushanyo, babanza gutekereza bakareba kure icyo bagiye gukora, ikintu umuntu yakoze muri mudasobwa iyo ageze no hanze akoresha bwa bumenyi akagikora neza, dutegura abana kugira ngo bajye bajya no mu marushanwa mpuzamahanga kandi ntabwo dukorana na Wisdom Schools gusa hari n’ibindi bigo dukorana."
Umuyobozi w’ishuri rya Wisdom Schools Bwana Nduwayesu Elie yavuze ko yashimishijwe n’uburyo abana batangiye kugaragaza ubushobozi bamaze kugira kuri Maths and robotics.
Yagize ati:"Kwereka Ababyeyi ibi bikorwa bijyanye na robotics nibyiza , kuko mwabonye ko bagiye bibonera uburyo abana babo barimo bubaka robo bakoresheje ubuhanga bukomeye, kuko iyo umwana agaragaje urwego amaze kugeraho bimutera umwete n’umuhate wo gukomeza gutekereza cyane, icyo dusaba ababyeyi nugukomeza gushyigikira abana bagakomeza gukarishya ubumenyi muri iyi porogaramu, nkeka ko impamvu ababyeyi batari bumvise iyi gahunda nuko batari bakabonye ibikorwa,"
Uyu muyobozi yakomeje agira ati:" turateganya ko mu minsi iri imbere tuzazana ibyuma noneho umwana akajya abihuza kubera ko bizaba bimurimo biri mu mutwe we azajya abikora neza, natwe nka Wisdom Schools ntabwo dusigara inyuma mu ikoranabuhanga tujyana n’Isi aho igeze kandi ndasaba ababyeyi gukomeza kudushyigikira muri iyi gahunda ifitiye abana bacu akamaro nibo bazajya bigisha abandi ku Isi hanyuma nabo bibabyarire umusaruro."
Iyi gahunda ya Maths and robotics imaze umwaka umwe itangiye muri iri shuri mpuzamahanga rya Wisdom Schools rifite amashami mu gihugu hose , bigisha indimi zitandukanye zirimo ,Icyongereza, Igifaransa, Igishinwa, Swahili ndetse n’Ikinyarwanda, bafite amashuri y’incuke, abanza ndetse n’ayisumbuye.
Yanditswe na Jean Claude Ndayambaje
