Yanditswe na Ndayambaje Jean Claude
Mu nama nyungurana bitekerezo yahuje abayobozi mu nzego zitandukanye z’Intara y’Amajyaruguru n’uturere tuyigize, yari igamije gusuzumira hamwe uburyo iyi ntara ihagaze mu kurwanya isuri, Minisitiri w’Ibikorwa by’ubutabazi (Minema), Kayisire Marie Solange yahaye umukoro abayobozi b’uturere tugize iyi ntara, wo kurwanya isuri bivuye inyuma batera ibiti byinshi bibanda ku nkengero z’imirima.
Ni nyuma yo kubona ko 58% by’ubutaka buhingwa muri iyi ntara bwibasiwe n’isuri.
Minisitiri, Kayisire Marie Solange, yongeye gusaba inzego zitandukanye muri iyi ntara gufata iya mbere mu kugabanya ubuso bw’ubutaka bwangizwa n’isuri kuko bikomeje kugira uruhare rukomeye mu igabanuka ry’umusaruro w’ubuhinzi cyane ko bitera n’imigezi kwangirika.
Muri iyi nama kandi byagaragajwe ko akarere la Gakenke kaza ku mwanya wa mbere muri iyi ntara mu kwibasirwa n’isuri, aho kuri ubu muri iyi ntara yose habarurwa ubutaka buhingwaho bungana na hegitari 319,318, muribwo ubungana na Hegitari 178,174 bwibasiwe n’isuri.
Minisitiri Kayisire yakomeje agira ati "Kenshi uturere twashoraga ingengo y’imari yatwo mu kurwanya isuri, rimwe na rimwe ikaba nkeya ntibitange umusaruro ufatika, ariko ubu ni ngombwa ko buri muntu wese kurwanya isuri abigira ibye, kugira ngo duharanire ko ingamba zo gukumira isuri zigera ku ntego ku rwego rufatika kandi rubonwa na buri wese."
Yakomeje agira ati "Nibiramuka bidakozwe gutyo muri ubwo buryo ni hahandi tuzahora duhanganye no kuba ubutaka bwacu burimo amafumbire buhora butembanwa n’isuri, dusigarane ubushariye, duhorane ibibazo by’ibiza gusa bidutwara ibyo tumaze kwiyubakira, bidasize n’ubuzima bw’abacu; uburyo bwiza rero bwo gukumira bene izi ngaruka ni ugukora igikwiye bifasha guhangana n’isuri tutarindiye ko biba."
Uturere twa Rulindo, Burera na Gakenke tuza imbere y’utundi muri iyi Intara y’Amajyaruguru mu kwibasirwa n’isuri, ahanini bitewe n’imiterere yatwo, cyane ko dufite imisozi ifite ubutumburuke bwo hejuru ndetse n’ibirunga, hakunze kurangwamo imvura nyinshi, igwa igatembana ubutaka, bityo hakabaho isuri.
Abitabiriye iyi nama kandi biyemeje ko bagiye gashyira mu bikorwa ibyo basabwe na Minisitiri, ndetse bakurushaho gukaza ingamba mu rwego rwo gukomeza kubungabunga ubutaka, nk’uko Umuyobozi w’Akarere ka Gakenke Nizeyimana Jean Marie Vianney yabitangaje.
Meya Nizeyimana yagize ati "Nibyo Koko muri iyi nama tuvuyemo batubwiye byinshi kandi byagaragaye ko tugifite urugendo rwo gukaza ingamba zo gukumira isuri, ducukura imiringoti. Ni ingamba twiyemeje gushyiramo imbaraga ndetse n’ubukangurambaga buzagirwamo uruhare n’abanyamadini n’amatorero bakadufasha kwigisha abayoboke babo, kandi twiteze ko bizatanga umusaruro."
Isuri igira ingaruka zikomeye harimo n’igabanuka ry’umusaruro mu buhinzi, ku kigero kiri hagati ya 5% na 10% buri mwaka, nk’uko byagaragajwe n’ikigo cy’Igihugu gishinzwe geteza ubuhinzi n’ubworozi (RAB), imibare cyagaragaje muri iyi nama.
