Yanditswe na Habimana Bonavanutre
Abayobozi biganjemo abakozi b’uturere turindwi tugize Intara y’Iburasirazuba bahawe amahugurwa mu buryo bw’imikorongiro agamije kubongererera ubumenyi mu guhangana n’ibiza ndetse n’ingaruka zabyo.
Ni amahugurwa y’iminsi itatu abera mu kigo cy’amahugurwa cya Polisi i Gishari, by’umwihariko akaba ahabwa abagize Komite z’Imicungire y’Ibiza z’Uturere tugize iyi ntara (District Disaster Management Committees (DIDIMAC).
Minisitiri w’Ibikorwa by’Ubutabazi, Kayisire Marie Solange watangije aya mahugurwa ahamya ko Intara y’Iburasirazuba ingaruka z’ibiza iyi ntara ihura nabyo zishobora kwirindwa mu gihe abantu bahagurukira kubirwanya.
Yagize ati: “Iyi ntara iri mu ntara dukoze neza ibiza byagabanuka, bikagaragara ko byagabanyutse kuko ntabwo nshidikanya ko muva hano muri aya mahugurwa mutabonye ibihombo duterwa n’ibiza; twese tugafatanya kubirwanya.”
Bamwe mu bitabiriye aya mahugurwa y’imikorongiro bemeza ko ingengo y’imari akenshi iba itateganyijwe igenda mu gusana ibyangijwe n’ibiza byakuruwe na muntu ari byinshi nyamara iyo biba byaratekerejwe neza mu nzira yo kubyirinda ari byo byakoroha.
Mutabazi Richard, Umuyobozi w’Akarere ka Bugesera yagize ati: “Imyubakire ni kimwe mu bishobora gukumira ibiza cyangwa se iyo cyakozwe nabi gishobora kubitera kubera ko amazi ajya kuba menshi kuko hari inzira zayo zitakozwe neza cyangwa zafunzwe, amazi ava ku bisenge yakusanyijwe ngo tuyakoreshe ahubwo ugasanga ari yo yikusanya akagira aho atembera yangiza.”
Ibiza bikunze kwibasira intara y’iburasirazuba birimo amapfa, imyuzure n’imiyaga ari yo mpamvu minisiteri y’ibikorwa by’ubutabazi ishishikariza abatuye iyi ntara kuzirika ibisenge by’inzu zabo no gutera ibiti.
Aya mahugurwa yitabiriwe n’abantu 49 bo mu nzego z’ubuyobozi ku nsanganyamatsiko igira iti "Kumira-irinde ibiza, witungurwa”.
Abagize komite z’imicungire y’ibiza z’uturere muri buri karere baricara hamwe bakareba ibiza bikunze kukibasira bakagena uko batabara baramutse bahuye nabyo ariko bakaniyemeza gushyiraho ingamba zo gukumira ibyo biza mu gihe kirambye.
Bamwe mu bagize komite z’imicungire y’ibiza z’uturere (DIDIMAC) mu turere tw’intara y’iburasirazuba
