Mutungirehe Samuel
Umujyi wa Kigali ufatanyije na Minisiteri y’Ikoranabuhanga no guhanga udushya byashyikirijwe ku mugaragaro ibimoteri bitanu birimo gukorerwaho igeraheza ku mushinga "Smart Waste Collection and Management", wo gukusanya no gucunga imyanda ibora n’itabora hifashishijwe ikoranabuhanga, hagamijwe kwereka abaturage uko ivangurwa no korohereza abafite imishinga yo kubibyaza umusaruro bakabikora biboriheye.
Ni ibimoteri bitanu biri ku isoko rya Kimironko, Ziniya, Kwa Mutangana, ku Mulindi no ku mudugudu w’Ikitegererezo wa Karama, byakozwe na gahunda ya Smart Africa biterwa inkunga n’ikigo k’iterambere cy’Abaholandi, Nord. Umuhango wo kubishyikiriza leta y’u Rwanda wabereye ku isoko rya Mulindi mu Murenge wa Ndera ahari kimwe muri ibyo bimoteri.
Umuyobozi w’Umujyi wa Kigali Pudence Rubingisa yavuze ko hari byinshi birimo gukorwa muri gahunda y’Umujyi ukeye, Smart City.
Akomeza agira ati "Smart City ntibyumvikane gusa nk’aho ari Kigali isukuye urebesha amaso isa neza gusa ahubwo iryo sukura, iryo terambere ribe rishingiye ku ikoranabuhanga."
Yakomeje avuga ko mu gihe abacuruzi n’abaturage bazajya bashyira imyanda muri ibyo bimoteri bavangura ibora n’itabora ababa bashinzwe ikimoteri bitazajya biba ngombwa ko baba bahari ngo barebe ko byuzura ahubwo ikoranabuhanga bikoranye rizajya ribereka aho kigezw cyuzura bityo bazire igihe.
Amaze gushyikirizwa uwo mushinga nk’uhagarariye Leta y’u Rwanda Minisitiri w’ikoranabuhanga no guhanga udushya Ingabire Paula yavuze ko uyu mushinga uri mu byo u Rwanda rwagaragaje mu mushinga w’Imigi ikeye ikoresha ikoranabuhanga "Smart Cities" ruzagaragariza ibindi bihugu uko byihutisha iterambere n’imibereho y’abatuye imigi.
Yagize ati "Mu ntego dufite yo kugira imigi irabagirana, smart cities, twiyemeje kujya twifashisha inyigo zitandukanye ku bibazo byogarije abaturage, ibikubiye muri izo nyigo tukabisuzuma, tukagira icyo duhinduramo cyangwa tuvugurura mbere yo kubikoresha ahandi.
Yakomeje avuga ko nyuma y’iri gerageza rigamije kwereka abantu uko imyanda ivangurwa bazarigeza no mu ngo, abaturage bakabasha kubyikorera.
Ku ruhande rwa Gahunda ya Smart Africa, umuyobozi wayo mu Rwanda yavuze ko bishimiye ko igerageza ry’uwo mushinga rikorewe i Kigali, ku bufatanye n’abafatanyabikorwa batandukanye nk’uko byari byiyemejwe mu 2017 mu Rwanda muri gahunda y’ubufatanye bwa Smart Africa Alliance.
Kuri buri soko muri ane no ku mudugudu w’Ikitegererezo wa Karama hashyizwe ibi bimpoteri uko ari bibiri bizajya bishyirwamo ibishingwe bivanguye, uruhande rumwe rujyemo ibibora irindi rushyirwemo ibitabora. Inzu ibikikije icunzwe na kamera zifata amashusho y’ibihabera kandi hakaba n’ingufu z’imirasire zituma uburyo bw’ikoranabuhanga buhari bupima umunota ku wundi aho imyanda igeze yuzura muri buri Kimoteri.
