Yanditswe na Samuel Mutungirehe
Minisiteri y’Ubumwe bw’Abanyarwanda n’inshingano mboneragihugu isanga abayobozi b’amadini n’amatorero bari kwiye kwibuka ko hari abayoboke babo bakeneye gufashwa kuva mu bikomere by’amateka ya Jenoside igihugu cyanyuzemo bakayoboka inzira y’ubudaheranwa.
Byagarutsweho na Minisitiri w’iyi minisiteri, Dr. Bizimana Jean Damascene kuri uyu wa kabiri, ubwo yafunguraga ibiganiro nyunguranabitekerezo, barebera hamwe intambwe imaze guterwa mu kwimakaza ubumwe n’ubudaheranwa ari nako bw’abanyarwanda mu madini n’amatorero, inzitizi zikigaragara n’ingamba zikwiye gufatwa.
Minisitiri Dr. Bizimana yabwiye abashumbye abayoboke b’amadini n’amatorero ko amateka u Rwanda rwagize yaranzwe n’ibihe byiza ariko anarangwa n’ibikomeye by’amacakubiri bityo hari ibyo bakwiye kwibuka intambwe y’isanamitima ku baciye muri ibyo bihe.
Yakomeje agira ati: "Ibi rero byasize ibikomere mu bantu benshi, baba abagize uruhare muri iyo politiki mbi, mu bwicanyi, muri Jenoside yakorewe Abatutsi; ingaruka ziri ku rubyiruko zikomoka kuri ayo mateka. No mu madini rero, no mu matorero, mu miryango ishingiye ku myemerere abo barimo. Nabo ni igice cy’Abanyarwanda nacyo cyagizweho ingaruka n’ayo mateka.
Ni ngombwa rero yuko nk’ababifitemo uruhare duhura tukagira umwihariko wo gutekereza no ku rugendo, ku kazi, ku bikorwa, byo kwifasha ubwacu ariko tukabona no gufasha abo dushinzwe."
Ku ruhande rw’uwari uhagarariye Kiliziya Gatulika, yavuze ko iyo arebye ku mibare y’uko abanyarwanda barenga 94% bamaze kugira ubumwe n’ubwiyunge adashidikanya ko harimo uruhare rw’amadini n’amatorero rukomeye cyane.
Yasobanuye ko icyo kigero cya 6% gisigaye cy’abatarabyiyumvamo giterwa n’ingaruka zirimo iz’amateka igihugu cyagize na mbere ya Jenoside, guhera ku mwaduko w’ubukoloni, amateka yo muri za 1959 ubwo igice kimwe cy’abanyarwanda cyatotezwaga, hakaza na Jenoside yakorewe Abatutsi yaje ari rurangiza.
Ati: "Hakenewe isanamitima risa naho rikora mu mizi y’ibikomere, ku buryo umuntu yumva ko abohotse, akize, byibuze ku rugero runaka.
Mu bindi Padiri wa Paruwasi ya Nyamata yavuze bijya bisubiza inyuma ubumwe bw’abanyarwanda no gukira ibikomere harimo n’ikibazo cy’ubukene.
Ati: "Buriya ubukene buragatsindwa, cyangwa se kubura uko wigira. Iyo umuntu wari warateye intambwe runaka yaba mu kubanarira, ubwiyunge, ubudaheranwa, mu bumwe, no mu gukira, iyo ahuye n’ikibazo akantu gahita kaza ni ugusubira inyuma; ukabona neza asubiye inyama, ukibaza uti ’uyu ni wawundi twakoranye urugendo cyangwa ahindutse undi?’ Ariko wareba neza ugasanga mu by’ukuri ikintu kibangamiye ibyo byose ni ukubura uko abigenza."
Rev. Pastor Isai Ndayizeye ushumbye Impuzamatorero ya ADEPR mu Rwanda, yavuze ko bahuye n’ibihe birimo ko mu gihe habaga hategurwa ibikorwa byo kwibuka Jenoside yakorewe Abatutsi mu 1994 nk’itorero hari abantu bumvaga ko byaharirwa leta ariko uko ibiganiro byagiye bikorwa babinye ko abibukwa bari abayoboke b’amatorero ndetse n’abakoze Jenoside nabo bari abayoboke bayo.
Kuva mu mwaka wa 2008, ukwezi kwa 10 (Ukwakira) ni ukwezi ukwezi kwahariwe ubumwe n’ubudaheranwa.
