Umugiraneza Alice
Abaturage bo mu murenge wa Cyuve bishyize hamwe bigurira imodoka y’umutekano ya Millioni 14 izabafasha kwicungira umutekano, ibi bintu bavuga ko bizabafasha gutabarirwa ku gihe.
Ni imodoka iri mu bwoko bwa Picapu Avor 1,5 ifite agaciro ka milliyoni 14
Aba baturage bavuga ko iyi modoka igiye kubafasha gushyira mu bikorwa gahunda y’irondo ry’umwuga.
Maniriho Joseph ni muwe mu baturage baje kwakira iyo modoka ku biro by’umurenge, yagize ati "Iwacu mu cyaro byari bitugoye cyane kuko hari nk’abasore birirwa bakina urusimbi abandi batemagura ibiti, abandi batwibira inka doreko mu minsi ishize aho tumariye gukaza umutekano dufatanyije n’irondo ry’umwuga hafashe 37, ariko ubwo tubonye andi maboko tugiye gushyiramo imparaga twicungira umutekano dufatanije n’irondo ry’umwuga."
Nibishaka Bernard nawe yagize ati "Iyi modoka y’umutekano ije ari nk’igisubizo kuko twabaga twagize ikibazo cy’umutekano hari nkabafashwe twahamagara police tugasanga yagiye gukorera ahandi bityo bigatuma ibyo byihebe bishobora no kuducika cyane ko iyo imodoka ibuze tubajyana n’amaguru, urumva ko hari igihe mutakigezayo kikabacika."
Ubuyobozi nabwo buvugako iyi modoka y’umutekano igiye kunganira ibikorwa by’irondo ry’umwuga kuko riri ku buryo bwubakitse, aho umutekano ugirwamo uruhare n’umuturage wese utuye umurenge wa Cyuve.
Nyirasafari Sawiya ni Umukuru w’umudugudu wa Mwidagaduro mu kagali ka Bukinanyana yagize ati " uyu munsi twaje kwakira imodoka y’umutekano twiguriye nk’abaturage ubwo twatahaga ibiro by’Umurenge wacu wa Cyuve, nibwo twahize umuhigo wo kugura imodoka y’umutekano; igiye kudufasha guhangana n’ibyihebe nubwo njyewe ntemeranya n’ibihazi cyangwa ibyihebe kuko nta Munyarwanda wagakwiye kwigira igihazi."
Akomeza avuga ko banjya bagira ikibazo cyo gufata nk’igisambo, bahamagara plisi ntibabonere ubufasha ku gihe. Ati "Twahamagaraga police bakatubwira ko imodoka yagiye ahandi bigatuma uwo twafashe aducika."
Umunyamabanga Nshingwabikorwa w’umurenge wa Cyuve, Bisengimana Jeanvier, yagize ati: “ Mbere na mbere ndashimira abaturage b’umurenge wa Cyuve; iyi modoka ije nyuma yo kubona ko bakeneye umutekano, ije kunganira mu bikorwa dusanzwe dukora umunsi ku munsi.
Izatuma na hahandi hashoboraga kuba hari uwaduca mu rihumye tuhagera vuba maze umutekano wa Cyuve urusheho gukomeza kugenda neza."
Cyuve ni umwe mu mirenge 15 igize Akarere ka Musanze, ukaba umwe mu Mirenge igize Umujyi wa Musanze. Uyu Murenge wakunze kuvugwamo ibibazo by’urugomo, ahanini byatezwaga n’udutsiko tw’amabandi yiyitaga amazina atandukanye nk’abanyarirenga, ibihazi, abuzukuru ba shitani n’andi menshi. Ni Umurenge kuri ubu uri kuzamukamo ibikorwa byinshi by’iterambere
