Abakoresha ikiraro cyo ku mugezi wa Kamiranzovu cyo mu Kagari ka Rwesero mu Murenge wa Kagano mu Karere ka Nyamasheke baratabaza ko ikiraro basanzwe bafite cyangiritse ku buryo butajya bwira hatagize umuntu ugwa mu mugezi ndetse ko hari uwaguyemo agapfa..
Iki kiraro gisanzwe gifasha abatuye mu Tugari twa Mubumbano, Ninzi na Rwesero, cyangijwe n’ibiza byatewe n’imvura nyinshi iherutse kugwa igatuma umugezi wa Kamiranzovu wuzura.
Umwe mu baturage yabwiye Mama U rwagasabo ati: “Hagwamo abantu buri munsi (...), amaze kugwamo nk’abantu nka bane, umwe yarapfuye abandi babakuramo ari bazima.”
Aba baturage bavuga ko nubwo bazi ko hari uwahasize ubuzima ariko bajya bagerageza kwambuka iki kiraro, nubwo bitaba byoroshye kuko bacyambuka bakambakamba.
Bavuga kandi ko bamenyesheje ubuyobozi bw’inzego z’ibanze ariko bukaba bwarabimye amatwi ndetse na bo bakaba badafite ubushobozi bwo kuba bakora iki kiraro mu buryo burambye.
BANKUNDIYE Gilbert nawe yagize ati “Iki kiraro cyarasenyutse, nta moto yakinyuraho, cyadufashaga mu buhahirane, ari abahinzi niho banyuza umusaruro bawujyanye ku isoko. Cyasenywe nuko cyubatswe mu buryo butarambye, turasaba ubuyobozi ko bakitwubakira imvura itaragwa.”
Umuyobozi w’Akarere ka Nyamasheke wungirije ushinzwe Iterambere ry’Ubukungu, Muhayeyezu Joseph Desire avuga ko iki kibazo basanzwe bakizi, nk’ubuyobozi ariko ngo nta gahunda ihari yo gukora iki kiraro muri uyu mwaka kuko nta ngengo y’imari yacyo ihari.
Avuga ko umufatanyabikorwa basanzwe bakorana mu bijyanye no gukora ibikorwa remezo, azasura iki kiraro akareba uburyo hakubakwa ikiraro kigiye hejuru, ku buryo iki kibazo kizakemuka burundu.
Yakomeje agira ati: “Umuti urambye ni ukuhashyira ikiraro kinyura mu kirere gikomeye, ku buryo kidashobora kuba cyakongera gutwarwa n’amazi.”
ibikorwa remezo mu karere ka Nyamasheke biracyari bike ku buryo uretse ibiraro n’imihanda igendeka ni mbarwa, bikaba bikiri mu bidindiza itarambere ry’aka karere gafatwa nk’aka mbere gakennye kurusha utundi turere mu gihugu.
Yanditswe na Sitio Ndori
