Mutungirehe Samuel
Bimwe mu byemezo byavuye mu nama y’Abaminisitiri yateranye kuri uyu wa Gatatu tariki ya 13 Ukwakira 2021 iyobowe na Nyakubahwa Perezida Kagame Paul, birimo abayobozi basimbujwe mu myaka barimo na Obadiah Biraro wari umaze imyaka 10 ari Umugenzuzi Mukuru w’Imari ya Leta (OAG).
Obadiah Biraro yasimbujwe kuri uwo mwanya na Alex Kamuhire, utari usanzwe azwi muri guverinoma cyangwa mu bayobozi bakuru mu nzego za Leta.
Biraro yagiye ku mwanya w’Umugenzuzi Mukuru w’Imari ya Leta tarikiya 1 Kamena 2011 azamutse mu ntera kuko yari amaze imyaka 6 akora muri urwo rwego nk’Umuyobozi Mukuru wungirije.
Yari azwi kuri uwo mwanya nk’Umuyobozi utarya indimi, udahishira abayobozi mu nzego za Leta bakoresha nabi imari n’umutungo by’igihugu mu bugenzuzi bw’urwego yari ahagarariye rukora buri mwaka mu bigo bikoresha ingengo y’imari ya Leta.
Mu bandi bashyizwe mu myanya mishya barimo Uwacu Julienne, wagizwe Umuyobozi Nshingwabikorwa ushinzwe agashami ko Kwigira (Executive Director/Community resilience Department) muri Minisiteri y’Ubumwe bw’Abanyarwanda n’Insingano Mboneragihugu.
Uyu Julienne Uwacu yari amaze iminsi mike avuye ku buyobozi bw’ikigega FARG cyavuyeho inshingani zacyo zikimurirwa muri Minisiteri yahawemo umwanya.
Undi wahinduriwe umwanya ni Nadine Umutoni Gatsinzi wari Umuyobozi w’Umujyi wa Kigali Wungirije ushinzwe Ubukungu n’Imibereho myiza y’Abaturage, yagizwe Umuyobozi Mukuru w’Ikigo gishinzwe Imikurire no kurengera umwana cyayobowe igihe kinini na Dr Anitha Asiimwe.
Inama y’Abaminisitiri kandi yagize ACP Rose Muhisoni Komiseri Mukuru wungirije w’Urwego rw’Igihugu rushinzwe Imfungwa n’Abagororwa RCS.
Yari asanzwe ari Umuyobozi wungirije w’Ishami rya Polisi rishinzwe Imikoranire ya Polisi n’Abaturage, (Community Policing), agiye muri RCS asimbuye Jeanne Chantal Ujeneza wagizwe Umuyobozi Mukuru wungirije wa Polisi ushinzwe Ubutegetsi n’Imari.
