Abaabanyamuryango basobanuriwe amateka ya Jenoside yakorewe abatutsi, nyuma y’uko kuri uyu wa Gatanu tariki 6 Kamena 2018 basuye urwibutso rwa Jenoside yakorewe abatutsi rwa Kigali ku Gisozi, aho bunamiye inzirakarengane zisaga 250.000 zihashyinguye.
Abasuye urwibutso rwa Kigali ni imiryango igizwe n’abagore n’abagabo bashakanye ubwabo, inkumi n’abasore baturutse mu turere twa Kirehe, Ngororero na Kamonyi, bamwe muri bo ni ubwa mbere bari basuye urwibutso mu buzima bwabo, abandi bari basanzwe basura inzibutso za Jenoside ziri hafi y’aho batuye.
IGIRANEZA Eric ashimangira ko kuba abashije gusura urwibutso rwa Jenoside byamufashije gushimangira amateka yigishwaga mu magambo, ubu akaba yiboneye ibimenyetso bisobanura amateka ya Jenoside yakorewe abatutsi mu Rwanda. Yagize ati: "Njyewe ubwanjye ibyo nabonye byanyunguye ubumenyi bugiye kumfasha kujya kwigisha urubyiruko nasize aho ntuye, mbabwira amateka ya Jenoside n’ibibi byayo nk’uwasuye urwibutso kandi nabo nzabasaba kurusura kugira ngo bigire ku bimenyetso bigaragarira amaso”
UMUHOZA Alice nawe ni umunyamuryango wa SEVOTA; we ni ubwa gatatu asuye inzibutso za Jenoside mu buzima bwe, ngo uko agenda azisura abona ko, imbaraga z’urubyiruko zakoreshejwe mu ishyirwa mu bikorwa rya Jenoside, bityo ari narwo rukwiye kuzikoresha mu kubaka bushya Igihugu, kandi rugaharanira kukigeza kure heza hashoboka.
SAVOTA (Solidalité pour l’Epanouissemenmt des Veuves et des Orphilins visant le Travail et l’Auto-Promotion) ni umuryango washinzwe mu 1994 nyuma gato ya Jenoside yakorewe Abatutsi, ugamije ubufatanye n’ubufashanye bw’abapfakazi n’imfubyi za Jenoside yakorewe abatutsi bagamije ubwisanzure n’iterambere.
NISHIMWE Marthe, ashinzwe imibereho myiza muri SEVOTA by’umwihariko agakurikirana amatsinda ari muri uyu muryango, asobanura ko gusura inzibutso za Jenoside bifasha abanyamuryango ba SEVOTA kumva neza ubukana n’ingaruka za Jenoside yakorewe abatuatsi.
Yagize ati: “Aba twazanye uyu munsi ni ababyeyi basigaye ari imfumbyi n’abapfakazi ba Jenoside, bakaba baraje gushakana n’abandi bantu batanyuze mu bihe bimwe ubwo Jenoside yakorwaga. Twazanye kandi n’urubyiruko rurimo abana babo n’abandi bana bavutse nyuma y’uko ababyeyi babo bari bamaze gufatwa ku ngufu muri ibyo bihe.
Tugamije ko bamenya amateka yabo, bamenye n’aho igihugu cyavuye, turabihuza n’isabukuru ya 24 U Rwanda rumaze rubohowe, bagomba kumenya icyo rwabohowe biciye mu kubasobanurira byimbitse amateka yose nk’aya asigasiwe n’inzibutso”
Uyu muyobozi ahamyaka ko nyuma yo kumenya uko RPF yabohoye u Rwanda bizatuma berekeza bemye mu rugendo rw’ubumwe n’ubwiyunge bazi aho bava n’aho bajya. ABanyamuryango 172 ba SEVOTA, basuye kandi igicumbi gishyinguwemo Intwari z’igihugu I Remera n’ingoro y’umuryango FPR inkotanyi kiri mu murenge wa Rusororo mu Karere Ka Gasabo.
